شهلة كانت كالنواره في الدوار .. زين وبهجة وخاصة كيف تحفل وتلبس.يبداو الشباب الكل يخزرولها وكل واحد يتمنى تكلمو..وتقرب منو..يتذكر كيفاش مره شافها مرة حافلة في عرس..كانت كيف نواره زهرة الشمس طالعة في عز الربيع.من غير ما يشعر بدا بشعر عليها شهله يا مولات العين الكحلة كي نشوفك نهاري يحلى نتمنى انحوزك يا نحلة في حلالي و نعرس بيك يا شهلة يا مولات العين الكحلة كيف خرج من دوار الهشيم كان في قلبو حاجه واحده.. هي شهلة..كان يقول في قراره نفسو زعمه تستناني حتى نخدم وانقد روحي في تونس ونرجع ونتزوج بيها. والا تتزوج من غيري.واللي يحبو يتزوجو منها ياسر.. اشكون ما يحبش يناسب عم فرج الحوانتي.. وزاده عندو كان هي. وحاطها في عينيه..سمع مره اللي ثمة واحد جاء خطبو فيها لولدو يخدم في الخارج.قالو عم فرج بنتي مازالت صغيره. وما عنديش بنات للزواج..هو في الحقيقة كان ما يحبش شهلة تفارقو وتخرج من دارو لدار زوجها وتعمل دار حتى هي..كان يقول اللي باش يطلب يد شهله ويتزوجها يلزم يوزنها ذهب..هو في الحقيقة كان يحب يبعد كل من يحب يتقدم لخطبة بنتو شهله..من شدة حبو ليها ما كانش حتى يحب يزوجها.. وكان يدخل احيانا في نقاش مع زوجتو خالتي هنيه.. تقللو يا راجل يزي الطفلة كبرت وما مالها كان تخذ راجل وتعرس وتعمل دار. لكن عم فرج الحوانتي يقللها.الطفلة بنتي وانا حر فيها . مازال وقت عرسها. مره دخل على فرج الحوانتي وقالو يا عم فرج راني انحبك. واحسبني ولدك اذا كان تحتاج اي حاجة انا هاني موجود.هو في الحقيقة كان يحب يتقربلو عم فرج الحوانتي كيف ما يعيطلو قالو انت راك ناس ملاح ومن معدن باهي قالو يا عم فرج يا خي انت هكة تشوفني اشبيها الناس الاخرى ينظرولي باندي ومعاركي .اشبيهم يعيطولي ولد الموجيره يا اخي انا خايب للدرجة هاذي يا عم فرج وهوما هكاكة ودخلت شهلة جايبة الفطور كيف كل يوم لباباها..تسمرت عينين السبتي في شهلة وما نجم ينطق حتى كلمة..نهارتها اول نهار كلماتو شهلة وقت اللي سلمت على باباها سلمت عليه هو زاده قاتلو اش احوالك يا السبتي اش حال خالتي زهرة عمتك سكت السبتي وما خرج من فمو حتى كلمة.. ما كانش قادر يدرد عليها والا يتكلم عاودتلو قاتلو سلم على خالتي زهرة كيف تروح .. فاق السبتي اللي هو قدام قهوة الانترناسيونال.. ما يعرفش كيفاش تذكر هذا الكل وهو ماشي في شارع الحبيب بورقيبه.. ——————- وغدا الحلقة السابعة فانتظرونا رواية ولد الموجيره تاليف محمود الحرشاني جانفي 2023
