ما فهمتش علاش في رمضان يحطوا كل شي على المواطن المسكين. ناس تغلي في كل شيء وتعلي في كل شيء. العطار ياخذ فيه باي والجزار ياخذ فيه باي وبيّاع الغلة ياخذ فيه باي والنصابة والقلابة.. والكل يقولوا الكلو من المواطن يلزمو إذا لقى البطاطا غالية ما يشريهاش واذا اللحم غالي ما يدورش بيه وإذا الغلة غالية ما يذوقهاش واذا المعدونس بسوم الذهب بلاش بيه لا يشري فلفل لا طماطم لا ملصوقة لا عظم وينقّص من شهواتو والا ينحيها فرد مرة.. معناها يصوم ليل ونهار ويعدي شهر رمضان يعوم في الناشح. ويكون هو المسؤول عن الغلاء والكواء والطمع والاحتكار والبيع المشروط والغشة والقلبة وهو المسؤول عن جشع التجار ولازم يقاطعهم وما يشريش حتى شيء من عندهم ويبات خفيف.. هكاكة يساهم في استقرار الاسعار وما عادش يتكوى بالنار وزيد يولي ثوابو ثوابين وصومو مقبول مرتين والجنة يدخلها مرتين ، خلّي يا فرحو يا هناه إذا قاطع الحوت واللبن والحليب والدقلة ولا شد صف والا في مرشي وقف تولّيلو كل خطوة بحسنة والحسنة بعشرة أمثالها. أما اذا مات بشهوتو والعين تخزر والقلب يوجع هذاك يعتبر من الشهداء ومن دنيتو لجنتو. المهم جماعة المراقبة الاقتصادية يضربوا النوم في رمضان ويشدوا بيرواتهم. ومسكين المواطن لا يزي رمضان جاه في الصيف لا يزي باش يعديه خفيف نظيف وكل رمضان وإنتم بخير.