ثمة حاجتين في حياتي ما نفهمش فيهم..السياسة والكورة. كان من السياسة اللهم عافينا الله تبعدها علينا وكان من الكورة اللي الناس بيها مقهورة ما نعرف منها كان قداش شدو في البروموسبور كل نهار أحد ولتوة وهاني مكهب على الخمسين سنة عمري ما حطيت ساقي في ستاد وما نعرفش لون القازون متاعو ورغم هذا قررت باش نحكي اليوم على الكورة على خاطر السيد لومار الله يحفظو ويبقيه ويخليه ويكثر من أمثالو ويطوّل في عمرو ويشدّ لنا فيه. الراجل مسكين قداش من سنا وهو مسلّم في بلادو وفي التورإفيل والأوروديزناي وفي اللوفر وقاعد بحذانا باش يعلمنا نلعبو الكورة ونشوطو ونمركيو. واحنا قلال خير ديما عافسين فيه ركبة في التلفزة والصحافة ولا خلينالو ولا بقينالو وهو مسكين يسخف. ديما ساكت ويلقط في خبزتو اللي تسوى 70 مليون في الشهر (اللهم لا حسد) ما فهمتش علاش شادين الراجل تقطعو فيه وتريشو.. «هاو ما يفهم شيء في الكورة».. «آشبيه ما عيطش للجزيري».... «آش بيه عيط للجمالي»..«آشبيه مالعبش جماعة ليتوال»..«آشبيه لعب جماعة الترجي».. بربي آش يهمكم فيه.. الفريق متاعو وهو حرّ فيه.. يعمل فيه آش يحب.. يلعب اللي يحب.. ويخرّج اللي يحب.. ويطرّد اللي يحب.. ويرضى على اللي يحب.. ويغضب على اللي يحب.. مادام «الجماعة» راضيين عليه ومسيبينو على طرق ذراعو.. وهو الفاطق الناطق.. آش حرق شعيركم.. حاسدينو في الزوز. فرنك اللي ياخذ فيهم؟ ياخي آشنوما 70 مليون في الشهر؟ مسكين عايش بيهم بالسيف وما يخلطوهش لراس الشهر. وساعة ساعة يعمل avance من عند الطاهر صيود باش يكمّل مصروف المرا والاولاد. تي ما يجيوش شهرية عشرة موظفين لمدة عام. وأش يسواو قدام التعب اللي قاعد يتعب فيه. كل ثلاثة شهور يراني 3 سوايع ما يكملهم الا ما يولي يلهث ويتقص عليه النفس. وبقية العام يعديه مسكين من طيارة لطيارة ومن مطار لمطار ومن أوتيل لوتيل ومن ستاد لستاد هاو شاف اللاعب الفلاني هاو تفرج في البارتي الفلانية.. هاو كلّم فلان هاو تعارك هو وفلتان. يحرق في مخو وأعصابو ومسلّم في عايلتو باش يلقى الحلول كيفاش ما نروحوش من الدور الاول لكاس إفريقيا؟ النهار وطولو وهو يكمبص ويهز ويسبط ويقيس ويغيس ويجرب في الملاعبية قريب يهبّط الجالية التونسية الكل تلعب في الفريق الوطني ورغم هذا الناس الكل عافسة فيه والناس الكل تنقد فيه والناس الكل ولات تفهم في الكورة خير منو. بربي قولولي ..ياخي تحبو تستعمروه على جرد 70 مليون في الشهر؟ نسيتو اللي لو كان موش هو ما نترشحوش لغانا بال Rachat؟» لو كان عطى ربي.. رانا نحطو مسيو لومار فوق روسنا وندورو بيه.. ونقدروه.. ونحبوه..ونبوسوه. ونعنقوه ..وفي الشهرية نزيدوه وعشرة سنين معانا نخلوه.. ونمدولو في كنتراتوه.. و100 مليون في النهار نعطوه.. ونشبعوه.. ونسقوه وفي الصحافة نشكروه.. وفي بالمكشوف ما نكشفوه.. والجزيري نسكتوه.. وفمو نسكروه.. واللي يهاجمو.. نهاجموه وطريحة نعطوه.. وكان لزم في الحبس نحطوه.. شفتو قداش ما نفهمش في الكورة..؟
