بالله.. بالذي لا إله إلا هو ..لو كان نحل عيني ونغمضها.. ونلقى روحي في مكتوبي مليار وإلا زوز الا ما ندخل ونخرج في الحلّة.. وتلقاوني حاجز جناح على ذمتي في الرازي.. الحمد لله ربي يعرف آش يعمل.. وخلاني ديما تح بح.. على خاطر لو كان يجي في يدّي ها المبلغ إلا ما نعمل شاطح باطح.. ونعمل في خلاها ما والاها.. ونبدا نفرني فيهم يمين ويسار.. وما يدورش عليّ العام الا ما تلقاني ربنا كما خلقتنا.. معنتها جيعان وطاح في قصعة.. إلا ما نشيخ ونيخ ونعدي عام سردوك خير من ميات سنا دجاجة... وانحي خمجة على قلبي.. ونبدا كي المرا اللي تتوحّم.. إشري هذي.. زيد هاذي.. أعمل هذي.. نشيخ مرتي ووليداتي ..كراهب وسفرات ورحلات وسهريات ونعوض عمري اللي فات في سلفني وهات.. ونولي نلعب بالألوفات.. وتدور بي الاصحاب والبنيات ..يتبعوا في ثنية الحنينات.. آه لو كان جاء في جيبي مليار الا ما نولي فرعون زماني.. وما عاد يكبر في عيني حدّ وما يلعبني حد.. وما ياقف قدامي حد.. وتولي الناس تبوسلي في الايدين والساقين.. ونولي سيد العارفين كلامي مقبول واللي موش معقول يولي معقول.. ونولي نصول ونجول وفي كل محضر عندي ما نقول.. مادام جيبي معبي بالكعب ..وفلوسي كي الميزاب تصب.. ويولي فيّ العسل.. يحبوني ويقدروني.. ويبجلوني ..ويتملقوني ويجاملوني ..واللي كنت نجيهم يجيوني ..ويجريوا في حظوظي..على خاطر مليان بالدزة.. الي تعملك قدر ومعزة.. آه لو كان جاء عندي مليار.. راني نولي سيد الناس.. مادام جيبي لاباس.. وهكة الدنيا وهكة الناس الفقري يموت تحت الساس واللي عندو يرفع الرأس.