الساعة خمسة حسب ساعة الحيط ، ومش مبين اذا الدنيا الصبح ولا المسا ، بس في شمس يعني الاحتمالين موجودين ، صوت خالتي ام علي بلعلع وبتقول لقرودها فش سم الهاري يعني كمان راحت علي وخسرنا الغدا اليوم ، وشكله يا الغاز خالص او جوز خالتي حردان . الجريدة اللي على الطاولة عليها طبعات كاسات الشاي ذكرتني باسماعين اللي شرب خمس كبيات شاي وما خلا عندي سكر يالله ان شاء الله يتسمم ، بستاهل لانه اجا وشكله مدسوس من ابو العبد الطماع عشان يقنعني ما ابسط في شارع الجاردنز يالله مش مشكلة راح اروح على دوار الداخلية او جبل الحسين وبعد التدوير على كاسات الشاي ما لاقيت ولا كاسة وشكله السبب هو خسارة الكاسات في طوشة امبارح مع اسماعين الاخوث . في مس كول من امي -حلوة مس كول - ، وخلصت اخر بريزة بالتلفون معها ، بتقول بكره جاي من اربد لعمان بدها مني مصاري عشان توخذ نقوط لبنت خالتي الولدانة في الرصيفة ،الله بيسر يمه . دخلت الحمام ورجعت على طول ، لان الميه مقطوعة ، في احتمال واحد ان اليوم مش الخميس دور حارتنا في المية وشكله اليوم راح أروح على مطعم سلامة العرة واترجى اللي خلفه عشان أغسل ، مش مشكلة . الساعة الان خمسة ونص وبرضه الموضوع مسكر معاي ، لاني دورت تحت التخت على نص البطيخة اللي مخبيها وما لقيتهاش يلعن حرمها وين راحت ؟ على كل حال بصبر شوي ومش مشكلة . الساعة السابعة عتمت الدنيا ، الحمد الله انتهت أول مشكلة عندي عرفت ان الدنيا مغرب مش الصبح ، لبست اواعي الشغل وناوي احط الدفتر على رف النملية في الغرفة وبس أرجع بكمل الكتابة . لسه في مشكلة والساعة سبعة ونص وما لاقيت فردة الشبشب الشمال ، ملعون حرسه اسماعين سرق الفردة بعد الطوشة . صارت الساعة تسعة وفش فايدة مش راح يستحي على دمه اسماعين ويجيب الحفاية وناوي أدبر حالي بأي "زفت" من بواب الجيران ... برضه مش مشكلة دورت على الفراطة لقيتها بعلبة الحديد المحطوطة تحت التخت عديت المصاري الموجودة لقيتها سبع ليرات وخمس وستين قرش بركة ويا رب عليك اتكالنا . الساعة وحدة بعد نص الليل بس أجيت ركض من دوار الداخلية لوادي الحدادة وابن ال.... بركض وراي ، راحت البسطة وأخذوا ابريق الشاي والدلة والغاز والعرباية ، بس الحمدلله ما قدر يمسكني ويوديني لعند المحافظ ، وكمان ضاعت فردة الشبشب اللي سرقتها من دار ابو خالد . الساعة ثلاث الصبح ما قدرتش انام جوعان ومش عارف كيف بدي الم حق الشاي والسكر واعوضه لابو اسحق صاحب الدكان لانه استلمني خمسة بلدي ، مش مشكلة ربك بحلها . الساعة ثلاثة ونص صباحا لسه جوعان وكمان الحمام فش فيه ميه ، طيب ، مش عارف الشباك مفتوح وحاس انه ، شو ؟ مش عارف . اتطلعت على الشارع من شباك غرفتي اللي على سطح عمارة ابو خالد ، شفت حاوية زبالة تحت الشباك بالزبط وشكله الجيران كاين عندهم عزيمة وزايد الرز شايفه من هون ... ادعيلي يمه بشوية لحمة منسية . الساعة أربعة الصبح ، كلاب الحارة كلها بالحاوية اولها خفت وبعدين لما اتطلع علي كلب أجرب صغير قاعد بمصمص بعظمة والله استحيت من حالي ، بطلت جوعان شكلي نعسان ، وأجري بتوجعني من الركض (الله لا يوفقك يا حمدان كأنه امانة عمان دايميتلك ) ، رجعت معدتي بتنقر في سماي بس مش جوعان ، والله مش عارف بس شكلي قرفان . الساعة اربعة وخمسة الشباك لسه مفتوح....... ولا تزعلي يمه ، شكله عزرائيل مخبيلي مفاجأة مش طبيعية وراح ادخل الجنة نط من الشباك لبابها في الحاوية وبالنسبة لنقوط بنت خالتي هيو على الطاولة اربع ليرات وسبعين قرش لانه نص المصاري وقعت مني وانا هربان من البلدية . التوقيع : مدير بسطة السعادة للشاي والقهوة – سلامة البرميل (يتم حفظ القضية على اعتبار أن المجني عليه قد انتحر قفزا من الشباك من على ارتفاع اثنى عشر مترا ويخلى سبيل ام علي واسماعيل وكلاب الحاوية) . جرير خلف
