وحتى ملفات القضايا تجيبهم معاها للدار..و تعدي وقت طويل وهي تقرا في ملفات القضايا وتعد في مرافعاتها..كانت هاذي وسيلتها الوحيده باش تملا الوقت متاعها.. وكيف تتعب تلعب شويه مع الكلبة متاعها..حتى اولادها قليل وين يتصلو بيها عن طريق السكايب وعادة ما يكون اتصالهم بيها في الليل. .لوين دخل السبتي حياتها.. في الاول كانت تتعبرو مجرد خدام حاباتو من القهوة باش يتولهى بالجنيه ويروح..ولكن السبتي بطرافتو وكلامو الحلو خلى المحامية وداد تستلطفو.. وترتاحلو.. خاصة وقت اللي يبدا يحدث فيها على مغامراتو..ما كانش يشد روحو قدامها ويقلها كلام حلو..يشيخها ويخليها تضحك وتنسى ما تشعر بيه من فراغ. وهاك علاش عطاتو غرفة خلفية في الفيلا متاعها باش يسكن فيها..نهار قاتلو تعرف علاش ارتحتلك يا السيتي قالها ما نعرفش وانا بيدي نسال في روحي السؤال هذا..قاتلو انت انسان ثقة وولد باب الله..واللي في قلبك في فمك قالها با مادام انا مجرد خدام..جيت من وادي الهشيم وراي كنايه كانت تقلقني برشه..كيف كانو يقولوهالي.. ولد المجيره..تعبت وتمرمدت ..كان حلمي اني نرجع لدوار الهشيم ونتزوج شهلة ونعمل عائلة كيف الشباب الكل..شهلة اللي قلت فيها احسن شعر قلت في حياتي..شهلة بنت عم فرج الحوانتي اللي ما كانش يكرهني..خليتها وجيت لتونس.. على امل نرجعلها..وفي تونس تعرفت على الفه اللي كانت تخدم معايا في القهوة.. حبيتها حب كبير..رغم اللي انا كنت نعرف اللي هي مطلقة..ولكن قلت الطلاق عمرو ما كان حاجز باش الانسان يجدد حياتو.. لكن الفه جرحتني جرج كبير..وخيرت باش تعاود ترجع تقرا من جديد وقالت اللي هي سكرت باب الزواج مره اخرى.. وبعدها تعبت ايام وقررت باش نخرج من البلاد جملة.. كنت نشعر انو ما بقى فيها ما يشدني..لوين ظهرت انت. .قاتلو المحامية وداد..وانا كيفاش تراني قالها انت سهير رمزي اللي حبيتها في الافلام اللي تفرجت فيهم..ورحمة الموجيره انت اجمل واحلى منها قاتلو.. زيد قول.. فتق مواهبك جبدت وداد سيقارو وقاتلو با الله ولعلي .. قالها يا مادام قلبي والع بطبيعتو.. من غير سيقارو..با مدام راهي الشمس تغار من نورك وجمالك.تعرف يا مدام انقلك حاجة وما تتغشش علي قاتلو قول قالها انت سميره توفيق في زمانها وقت اللي تبدا تغني ..قاتلو تعجبك سميره توفيق قالها .. اش تعجبني يا مادام.. قاتلو توى ثبت روحك..سميره توفيق والا سهير رمزي قالها السبتي..وراس سيدي بوحطبة انت احلى منهم الاثنين ضحكت وداد ضحكة عمرها ما ضحكت كيفها في حياتها..وخلاتو وقاتلو عندي ما نعمل داخل الفبلا.. تفكرت عندي تلفون اكيد مع بنتي تستنى في..في الوقت هذا.. ما مضاتش مدة طويلةعلى دخولها للدار..حتى بدات تعيط للسبتي … قاتلو ايجا حاجتي بيك باش تهبطلي حاجة من فوق السبتي ما سبقش انو دخل لبيت مدام وداد حتى مره.. كيف دخل لبيت مدام وداد لقاها لابسه لباس خفيف ما شافهاش لابساتو من قبل. حب يغلق الباب ويرجع قالو اشبيك..رجعت.. كنت في بيت البانو. اندوش . وانحبك تشيحلي شعري بالسشوار.. انخاف نستبرد —————————- مع تحيات محمود حرشاني انتظر تعاليقكم وكيف رايتم تطور احداث الرواية وهل كانت الخاتمة مناسبة وهل تصورتم انتم خاتمة مغاببره؟
