ومتى كان السكر مخالفة في بلادنا؟؟؟ تي البلاد بكلها سكرانة…تي هو حتى الارهابي إلي قالوا أقوى من "سوبرمان" طلع ملحلح… ومزطول…. وفي بلادنا حتى إلي ما يسكرش بالبيرة والبوخة والكولة واللاقمي والزطلة أوكا أقوى حكومة في التاريخ كرمك الله وأبقاها ذخرا للوطن وعلى رأسها بونا الكبير الباجي وخونا الكبير مرزوق… كدسولنا الزبلة في كامل البلاد … ولي موش في مقدورو باش يشري البربر والمورناق و الحرابش والنفة يحل الشباك متاع دارو يزي… توة ريحة الزبلة تسافر بيه طول…. تي راهي تضرب في الراس أقوى من النفة البيضة…. تي عندنا واحد جارنا فد.. روحو طلعت من السخنة… وقف في وسط دارو ونادا العايلة الكل وهو عنيه حمر…. واكشاكشو على فمو .. وقلهم سايي « ça y est »… ما عادش منجم نصبر.. سياي… راني ماش نحل… داروا فيه الجماعة الكل … يا بابا يهديك …يا بابا في طولك… يا باباب في عرضك… شي النافع ربي .. الراجل شد صحيح وامرق في الجماعة الكل وحل الشباك… ويا ليتها من عملة… جميع الذبان والوشواشة والناموس إلي في جبل الزبلة إلى تحت شباكو هجمت علىيه في الدار… وما يزيه هاكا وزادت الريحة عطات والراجل ولى يتهز ويتنفض… وبدا يتطايح و هتري…. جا ولدو الكبير في بالو يسكر الشباك تحل عليه بوه: – نحي من يدك.. الشششش..شبببب..بببب…باك…يا ول…ول…د الكل… كل…كل…ب… – يا بابا راهو الطبيب منبه عليك وقلك راهو بدنك ما عادش يستحمل أكثر… وامنع عليك كل أنواع المخدرات والمسكرات…. يعيش بابا يهديك… يا خي موش قلتلنا إلي انتي تبت وما عادش ترجع… – براااا… لو…لو…لوح… عليك…من ..من…من هاللو… هالاو…هاللوغة… وخليني نعمل إلي نحب… قبل كنت نمشي للبار باش نشرب… توة آهو البار ولا قد….قد….دام ….الدار واتحبني ما نس…نس .نسكرش…. ما كمل الراجل يكمل كلامو حتى طاح ما في عينو بلة… هزوه يتجاراو للاستعجالي … وغادي عينك ما تشوف إلا النور… يلقاو العباد مكدسة على بعضها…. والعياط والزياط… والبيروات المسكرة.. والتولاتات المطينة… والدنيا مزقزقة بالماء والدم والروايح عاطية مسد في القسم بكلو….. وعركة للسماء السابعة… -آش ثمة؟؟؟ -عركة.. – علاش… – الطبيب وحدو والمرضى ياسر وثمة راجل حالتو خطيرة يطلع في الروح وما لقا آش كون يتلها بيه وما حب حد يعطيه بلاصتو…. – حتانا الوالد متاعي حالتو متعبة برشة….؟؟؟ – ما عندك حتى حل وليدي.. يا تستنى ..يا تهز اداوي بوك بالفلوس…. اتغشش الطفل وقام يصيح… بدا يسب وقسطل… ويلطخ في البيبان…. فيسع جاوه.. 8 "سوجيقارد" هزوه يد وساق ورماوه في الباقا وهزوه للمركز…. – ما تحشمش سكران وتتعارك في السبيطار ؟؟؟ – يا خويا عندنا شهر واحنا نكلمو في البلدية تجي تهز الزبلة من قدام الدار وهية مارقة فينا… أش نعمل… ريحتها ولات أقوى مالدروق…. واش بيك تعارك في الطبيب وفي الفرملية في السبيطار….؟؟؟ – كيفاش ما تحبنيش نطرشق ونتعارك وقت إلي في استعجالي فيه 100 مريض يطلعو في الروح وثمة طبيب واحد آنتارن أما ثمة 8 سوجيقارد باش إلي يحل فمو يفركوهولو هذا موش شي ينطق من الأجناب… – يا خي وين تحسايب روحك عايش في فرنسا وإلا في أمريكا … فيق يا بابا راك عايش في تونس…. ما تعرفش إلي بلادنا في أزمة وهاذاكا حد الجهيد…. رانا زواولة ما عندنا شي في هالبلاد لا بترول ولا سياحة ولا فسفاط ولا فلاحة… وزيد الشعب التونسي أبخل وأخمج عباد ربي ما يحبو كان الفلوس والشيخات والنوم…. منين بابا باش تجيبلك الدولة طبيب آخر…؟؟؟ – شمعناها؟؟؟ معناها نموتو وعينا تخزر… إلي عندو يداوي ولي ما عندوش يموت…. إلى يسكن في حي المنزه تتهز الزبلة من قدام دارو ولي يسكن في حي شعبي يعدي ال24 ساعة سكران بالريحة؟؟؟ هذا ظلم… – كيفاش…كيفاش…. واحد كيفك انتي ما يسواش زوز صوردي … كلوشار مالبريمة تتكلم في السياسة وتسب في أسيادك… أيا أنا كنت ماش نسامحك في الأول أما كيف طلعت لسانك طويل وإرهابي وتخطط لعمليات تفجير واتحرض على العصيان المدني وضد قانون الإرهاب وضد الجدار العازل وضد المصالحة الوطنية … أنا توة ماش نعديهالك قضية إرهاب وخيانة عظمى …مادام قانون الإرهاب مازال فركش وتو كي طلع من المجلس … برة صحة ليك ماش تكون أول واحد يدشنو… أيا هزوه.
