تداول نشطاء على مواقع التواصل الاجتماعي اليوم السبت 09 ديسمبر ،فيديو لأعوان مراقبة تابعين لشركة السكك الحديدية بصدد تعنيف أحد الركاب ،بسبب عدم حيازته على تذكرة. و تحدث شاهد عيان عن تفاصيل ما حدث وقال : 8:45 نطلع في ترانً الضاحية الجنوبية من الزهرة في إتجاه حمام شط نطلع نلقى 4 أعوان مراقبة شادين رجل كبير شدينه تحت رجلاهم و هو يقلهم سيبوني وفما شوي كلام زايد من سيد هذا وقلوله توا في مركز نسيبوك أنا فيبالي سيد سكران ولا بوهالي ياخي في محطة الزهرة معهد يطلعوا 5 أعوان أخرين من مارقبين فيبالي بش يهبطوه.. ياخي وقفوه ودخلو فيه ضرب ياخي ووقفت نصور و رجل أخر حب يحز عليه دزوه وحبو حتى يضربوه ياخي قلهم راني شرطة (هو يكذب بش يسلكهاله ) ياخي قلوله أهبط معنا ومن كلمة كلمة دزوه.. ياخي جاء سيد بش يحز عليه زيد فرحو به وطيحوله زوز سنون وحلوله وجهه ياخي فاق بيا عون نصور جاء قلي فسخ لصورته .. ومعندكش حق تصور قتله عندي حق ونفهم كي رفضت دزني وشادلي يدي لين خذه وقلي تو تهبط معايا للمركز وتفسخ كل شي بسيف عليك وبعد جبت ستوش بش نهز رقم شكون ونشوف كيفه نكلمه ياخي ختفلي ستوش وهز برمي خاطر ملقاش بطاقة تعريف وقلي توا نعطيك خطية باهية ونهبتك للمركز توا تعرف كيفه ياخي قتلة هاني بش نفسخ خاطر أنا عارف بش يبقو في(iCloud ). في حمام أنف بقوا مسكرين علينا باب لين جو شرطة هزونا للمركز و أعوان مرقبة ماجاء حد و فما شكون لعب فها دايخ وبيش إهزه لسبيطار وسيد لفمه محلول وسنونه طايحة وعيناه محلولة مشى للمركز عملوله محضر أما سيد ظهر مش من تونس و يسكن في برج سدرية ويخدم مرمة في رادس مليان وهو غلط صباح هبط في رادس كي عاود ركب باش يرجع لرادس مليان شدوه معندوش تسكرة ڨالوله بطاقة تعريف قلهم معنديش من كلمة كلمة بقو شادينه ياخي هو إنفعل شدوه تحت كرسي لين يوصلوا لبرج السدرية أما بعد طلعوا زميلهم فرحو بيه وصار لصار… سيد هذا اعطوه إستدعى باش يمشي بيه للسبيطار بن عروس بيش اعدي ياخي حط إستدعى قدام مركز وروح ( خاطر معندوش فلوس بيش يمشي يعدي ويشكي)خلي ياخو حقو” يشار أن مراقب قطار أول رياض التواتي أكد مساء اليوم، أنه تم إيقاف المواطن مع الأعوان الأربعة الذين تبادلوا العنف مع هذا المسافرعلى ذمة التحقيق ،كما أكد أن المسافر هو الذي بادر بالعنف اللفظي والجسدي على الأعوان إثر مطالبته بالاستظهار بتذكرة السفر على مستوى محطة رادس مليان. وأضاف رياض التواتي أن المسافر كان في حالة غير عادية وبدأ في شتم الأعوان وقام بالاعتداء على أحدهم مما تسبب له في إصابة على مستوى الرأس أثناء محاولته الهروب من القطار على مستوى حمام الأنف.
