علّق الباحث في علم الاجتماع، معاذ بن نصير، اليوم الاحد 9 ماي 2021، على القرارات الصادرة مؤخّرا عن رئاسة الحكومة والقاضية بإقرار الحجر الصحّي العام ومنع التنقل بين الولايات وغلق الأسواق. وقال في تدوينة على حسابه الرسمي "فيسبوك" : "ما فيها باس كي تحط في فريقك مختصين من علم الاجتماع و إلي قادرين يوجهوك قبل ما تاخذ أي قرار ، لعدة أسباب: - الحالة النفسية للمواطن التونسي متأزمة جدا... - الحالة المادية صعيبة برشا... - برشا اصحاب المهن الحرّة على حافة الإفلاس و العيد فرصة باش يرجعوا شوية خسائرهم المادية... - برشا يعيشوا من المهن العرضية و إلي هوما أغلبهم من أبناء الطبقة المسحوقة و أبناء الأحياء الشعبية المهمشة... - التاريخ المعاصر و الجديد يثبت انو أغلب الحراكات الاجتماعية سببها التهميش و تصلب السلطة السياسية... - ما عندكش ثلاثة شهور لتالي ملي هبطت تقمع في الاحتجاجات الشعبية ، معنتها و بالعربي الشعب حاضر سلوكيا لأي حراك متاع تمرد و احتجاج... - العيد عندو صبغة دينية أوك ، اما زادة عندو جانب اقتصادي كبير و كبير برشا ، و ثمة شكون يعيش ماديا من فترة العيد... - التونسي ماديا و بنسبة كبيرة يشري من الاسواق الاسبوعية خاطر ماديا تعب و يعتبر السوق الاسبوعي للزوالي و ينجم يشري منو عكس المساحات الكبرى ، دونك تحب و إلا تكره باش يشري مالسوق... - عندك نسب كبيرة من اليد العاملة تشتغل في المهن و الحرف و إلي هاذم يستناو في العيد كما الحجامة و الحلو و الدبش... - صورتك و قراراتك إلي معادش عندها حتى أثر و لا حتى قيمة في أعين الشعب التونسي ، دونك اي قرار باش تاخذو مش باش يعنيهم و خاصة كي تسبق بكلمة صرامة... - الشعب التونسي ذكي و ذكي برشا و عارف إنو حزامك السياسي بدى يتخلى عليك و بديت تضعف على مستوى الحكم... - كي تقول باش نسكر البلاد في اقل من 24 ساعة ، هوني حطيت اكتظاظ كبير على وسائل النقل العمومية و هذا إلي شفناه في محطات النقل، هربت مالقطرة جيت تحت الميزاب ، كان من الأجدر تخلي التنقل بين الولايات... هاذم بعض النقاط الصغيرة و إلي تبينلك إنو قرارك بتسكير البلاد قرار غالط طول و غرض ، و لازمك قبل ما تاخذ أي قرار تفهم الجانب النفسي و السلوكي و الإقتصادي لشعبك.."
