قال باش ننتخب قيس سعيّد كلا ما كلا الطّبل نهار العيد، يا ظلامي، يا اللي ضدّ الحرّيات، تنتخب مرشّح معاه المجرمين وروابط حماية الثّورة والنّهضة...ما هلكوها البلاد كان العباد اللي كيفك...خاف... قال أيا برّه ننتخب نبيل القروي...ياخي سمّعوه ما تكره وذنيه، يا مافيوزي، يا فاسد، يا اللي مع تبييض الأموال، ما هلكوها البلاد كان العباد اللي كيفك...خاف... قال أيّا تعرفوش كيفاش لاني منتخب لا هذا لا هذا، آتو نحط ورقة بيضاء، طاحوا فيه ركبة بالسّبّان، هاو متهرب من المسؤولية، هاو جبان، هاو الصّوت الأبيض ما يتحسبش، هاو إنت تعاون في هذا وإلاّ في ذاك، ما هلكوها البلاد كان العباد اللي كيفك...خاف... قال باهي، آتوّ نصبح راقد نهار الرئاسية وما نمشيش ننتخب، داروا بيه جوقة: حرام فيكم المواطنة، ما تنتخبوش وبعد تجيو تتبكّاو وتتشكّاو، الانتخاب واجب، ما هلكوها البلاد كان العباد اللي كيفك... الحاصل، سمعت بيه عامل مطلب لجوء في صبيطار الرّازي..