توة يا سيدي وفات الامتحانات.. ووفات الغصرات.. بقات غصرات أخرى الله لا يوكلها لكم.. خصوصا مع جماعة الباكالوريا.. هو ما الجماعة يسخايبوا كي كملت الامتحانات..وفات الغصرات وهي مازالت كي بدات.. غصرة التوجيه وما أدراك ما التوجيه.. صفوف صفوف قدّام باب الوزارة يعمروا.. ويهندسوا.. ويكمبصوا... كيفاش يلقاو ولها حل اللي بمجهود و..يعمر وباعث الناس الكل تزمر.. واللي بالمعارف والوجوه والأكتاف والكارت فيزيت مطفي الناس الكل وذراعك يا علاف.. وكي المرشي خوذ بايك على بكري لا ترصيلك ملوح في بعض البلايص وحتى ما عندكش توجيه أصلا ..وشوية من الله وشوية من عبد الله.. شوية من الإدارة كثر عليها الدهك.. وشوية من الطلبة اللي نجح بال«Rachat» ويحبّ يتعدى للطب على خاطر العيلة الكلها طبّة وماشية في سبرهم واللي يحب يتعدى حقوق على خاطر جدو قاضي وبوه رئيس محكمة وعمو عدل تنفيذ.. وولد عمو عدل إشهاد واللي يسكن في تونس ويحب يقرا بحذا باب دارهم واللي بوه (ر.م.ع) ويحب على بورص باش يعملو مصروف للكرهبة.. اللي يحب يمشي للصحة وهو يدوخ كي يشوف منظر الزريقة أما ميسالش وكلو يهون باش يخدم في سبيطار ويعمل سوايع في مصحة ويحل حانوت هلال أحمر ويعمل ضربات في الديار.. الكل يجاهدوا ويحاربوا على جميع الواجهات اللي بمجهودو واللي بجدودو.. وما تجي كان في راس المسؤولين على التوجيه صيفية زقحة تلقاهم يخدموا من الثمنية متاع الصباح لنصاف الليالي باش يحظروا النتائج وأسيادنا الطلبة موش عاجبهم.. أعطيني هذي بدللي هذا.. حطني لهنا.. قربني لهنا.. بعثني ليك فلان.. يسلّم عليك فلان.. وما توفا مشكلة التوجيه كان كي تولي وجوه المسؤولين على التوجيه في قفاهم باش أسيادي الطلبة يرضاو ويتمتعوا و يكملوا عطلتهم اللي في البحر، في البحر واللي في سفر في سفر وديما تسمع ما عاجبني شيء وموش هكة يلزم يكون كل واحد ما ذابيه يكون مسؤول باش يريفل أمورو وأمور عايلتو وأصحابو وصاحباتو وحدو. واللي يغلب التونسي يجي يحاسبني تحطو في الجنة يقلك برد علي تحطو في النار يقلك سخونة علي تحطو بيناتهم يقلك علاش تحب تبيتني في الشارع. فيصل الصمعي للتعليق على هذا الموضوع:
