آشكون قال اللي أحنا بلاد صغيرة في العالم وما نظهروا شيء قدّام بلدان العالم الآخرين... يكذب عليك اللي يقلّك... هذيكة غيرة على خاطر ما عندهم اللي عندنا... وكي تجي تحسب تغلط... موش أحنا اللي عندنا من أكبر نسب حوادث طرقات في العالم؟...؟ موش أحنا اللي عملنا أول دستور في العالم في قرطاج؟... موش أحنا اللي عملنا أكبر مطبقة في العالم؟ موش أحنا اللي طيبنا أكبر كسكسي في العالم... موش أحنا اللي عملنا أكبر سروال في العالم؟ وهاو مازال باش نحققوا الرقم القياسي العالمي لحرقة الرياضيين في العالم... السنة بركة، قالوا صبّ الزيت وما خلاو كان عجاجهم في بلاد السبافيتي والبيتزا؟ والرقم مرشح للتصاعد... نكبّروهم... ندربوهم... نصرفوا عليهم نسفروهم ومن بعد يقولوا لحما يا ستار ويخليوا أهل البلاد في البلاء... توة هذه موش عملية تتورخ... تي حتى جماعة الموزمبيق والصومال ما عملوهاش... توة تفهمو مدير شركة وإلا مسؤول في بانكة يفلب ومعاه ملاير وإلا زويّز يعيش بيهم بيْ آما واحد ما أكسبو survetement وسبادري هذي بلحق تتورخ... نسيت باش نقوللكم اللي أحنا عندنا أكبر نسبة بياعة ملاوي... وبياعة خبز طابونة وبياعة الريح للمراكب وبياعة كلام وبياعات إشاعات خصوصا في الصيف... هاو فلان طار وهاو فلان باش يطير وفلان قصّولو حبوانحو وفلتان جمدوه في الكونجيلاتور ومن بعد رضاو عليه ونفنفوه ونعوشوه ورجعت فيه الروح، وإشاعات الترقيات والنقلات في بلادنا حطّمنا أغلب الأرقام القياسية ومازال الخير القدام... إنشاء الله ما يجيش نهار نلقاو منتخب كامل قلب الفيستة وقلب لبلدان أخرى وهكاكة ندخلو موسوعة فينيس على بزّ ومعناه وندخلو التاريخ من بابو الواسع والعريض ونقعدوا فضيحة بين البلدان كيما قعدنا في بلاد الطليان نكتب هكة وأنا نخمّم على البطولة الإفريقية وكاس العالم وستار ربي. فيصل الصمعي للتعليق على هذا الموضوع:
