ماو قالك يا سيدي بن سيدي والعهدة على من قال اللي شهر رمضان السنة ما كيفو حتى شهر.. كل شي باش يتعدى كي الزيت فوق الماء.. ولا فمة حد باش يتشكى ولا فمة حد باش يتبكى.. لا فمة احتكار ولا سلع مخبية في الدار.. وكل شيء gogo à مالبطاطا للمعدنوس للفقوس.. غير اصرف الفلوس.. وفرني بالدنوس والعاشور والخموس.. رمضان السنة قالك والعهدة على من قال.. كل شيء متوفر ولهذا المواطن ما يلزموش يكون على اعصابو ومتوتر.. الدجاج ملوح تلويح.. والعلالش مشلقحة تشلقيح.. والخضرة اكداس اكداس.. فلفل وطماطم وخس وبسباس.. والغلل مكومة كيف الجبل.. وسلطان الغلة يتباع بالسطل.. غير اجبد الصرمية وحل.. وقالك يا سيدي بن سيدي.. اللي شهر رمضان السنة.. الخيرات السبعة موجودة فيه.. من العظم.. للملسوقة اللي لاهي مقطعة لا محروقة.. واللي لا فمة لا غلاء ولا كواء.. ولا حد يتشوى من الغشة والقلبة.. واللي النصبة باش تبدا بجنب النصبة.. غير اتشهاو.. وتمناو.. وعبيو القفاف والساشيات وكركرو وجيبو.. واملاو الفريجيدارات بالقضيات.. غير اندبو على الحنينات.. وقالك يا سيدي بن سيدي والعهدة على من قال.. اللي المراقبة الاقتصادية توضعت في حالة طوارىء قصوى.. وحالة تأهب.. وحالة استنفار.. وباش يخدمو ليل مع نهار.. وابوك اللي يطيح بين ايديهم.. الرحمة لا.. واللي المخالفات والخطيات والتسكيرات باش تبدا اكثر من البطاطا الانديزا.. واللي التجار والقشارة باش يبداو عينيهم على اكتافهم.. وقالك يا سيدي بن سيدي والعهدة على من قال.. اللي رمضان السنة لا قبلو ولا بعدو.. ابوك يدخل من هنا يخلط عليه المكتب من غادي.. واللي تجار نهج بومنديل و rue de saline استعدو اتم الاستعداد لتلبية حاجات المواطنين من قلمات الرصاص وستيلوات بوميا والكرارس بو 500 م والمنادل والكراطب والسكوتش والمساطر والقومات والبرايات.. غير تتصب الشهريات.. وتتعمل التسبيقات.. ويتوافق على القروضات من البانكات.. باش نفرحوا الصغيرات.. ونتبلعوا في الديونات.. للعناكش والكرومات.. وقالك يا سيدي بن سيدي والعهدة على من قال اللي الزوالي السنة باش يشطح بالمحارم.. بين رمضان والمكتب والعيد.. وما يوصل لنصف اكتوبر لا ما يدخل ويخرج في الحلة ويطيح ما في عينو بلة.. على خاطر يلزمو من الفلوس قلة.. واللي يخرج منو سلامات يلزمو يعمل وعدة.. ويطيب قصعة.. وقالك يا سيدي بن سيدي والعهدة على من قال.. اللي تسونامي هذا متاع المصروف باش يتواصل عامين اخرين.. ولهذا يلزم نكبسوا السنتورة على آخر نقبة.. ونقتصدوا ونتقشفو وفي عوض نشربو نترشفو.. وكان لزم نصيمو شهرين والا ثلاثة.. منو اقتصاد ومنو ثواب.. باش ما نعيشوش في العذاب.. ويا حليل الشهار والزوالي.. واللي لا عندو لا حرثة ولا ورثة.. والا ما عندوش حويجة تحت راسو.. باش يتعدى علية شهر اغبر.. الله يعديه على خير.. وتصبحو على خير.. خير..