لو كان نهار يعدّيو التوانسة على الطبيب نأكدلكم اللّي أغلبيتهم باش يلقّاوهم يلزمهم يتعداو على سراط الدكتور سليمان الأبيض الشهير ولما يخرّج منهم ما يخرّج من عقد.. بالله أشكون اللّي قعد ماهوش متعقد؟ كل واحد بعقدتو.. وكل واحد بمشاكلو.. تلقى اللّي عندو عقدة او ديب.. واللّي عندو عقدة الفقر واللّي عندو عقدة الغنى.. واللّي عندو عقدة الفلوس واللّي معقد بالبوس.. واللّي عندو عقدة كثر الصغار واللّي معقد من قلة الصغار.. واللّي معقد من التوقيت الصيفي والساعة الزايدة.. واللّي عقدتو المصرانة الزايدة واللّي معقد من الكار وفمة اللي معقّد من الدمّار واللّي معقد من الخنّار.. واللّي معقد من ستار أكاديمي.. واللي معقد من البطالة واللّي عقدو ضربان البالة.. واللّي معقد من القراية والامتحانات.. واللّي تعقد من البنيات.. واللّي معقد من العرس واللّي عقدو الفلس.. واللّي معقد من المصروف واللّي عقدو لحم الخروف.. واللّي معقدتو الكليبات واللّي تعقد من الفاتورات.. واللّى معقد من الريزو الطايح واللّي عقدو العومان في الشايح اللّي تعقّد من الحروبات واللّي تعقد من برامج المنوّعات.. واللّي معقد من مرتو ديما عاقدتها.. واللّي معقدة من جارتها حاسدتها.. واللّي معقدة من الرجال.. واللّي معقد من قلّة المال.. اللّي معقد من الكراء.. واللّى عقدتو العراء والقرا وقلّة الحياء.. وفمّة اللّي عقدتو جات من الكورة.. وفمّة اللّي تعقد من الكياسات المحفورة.. وتلقى اللّي عقدتو الشهرية وكيفاش يقبضها الصباح وتوفالو العشية.. واللّي عقدتو من الكفتاجي والملاوي.. حتى لين ضربو قصور في الكلاوي.. واللّي تعقد من الميساجات.. واللّي عقدتو الآبالات.. واللّي جات عقدتها من الغبرة.. اللّي خلاتها مذهوبة الشيرة.. واللّي جات عقدتو في الحرقة.. واللّي تعقد من البراكاجات والسرقة.. واللّي عقدتو من البلدية.. والخدمات الإدارية.. والتكركير في الوظيفة العمومية.. واللّي تعقد من الفيس.. والتبهنيس.. وجماعة التبزنيس.. واللّي عقدتو السياحة والتوريست.. واللّي عقدو القاراجيست.. واللّي عقدوه الفنانين والفنانات.. اللّي غاطسين في الملاين وشايخين في السهريات.. والعروسات.. والمهرجانات.. وديما يشكيو اللّي ديما مكشبرين.. وعلى الطبّة النفسانيين داخلين خارجين.. لو كان يعدّيوا التوانسة الكل عند سليمان الأبيض.. لما يغوّص ويولّي ملياردير.. ويبني بلاصات في النصر.. ويحلّ عيادة جديدة ويبني بورطمان للسبوعي.. ويحلّ حانوت لفوشيكة.. وpublinet للباجي.. ويهرب من فوفة.. وجنّات العرّافة.. وهذا الكلّ من كثر ما يخرّج من التوانسة من عقد.. اللّي واحد كيف يعدّدهم.. تهبطلو عقد.. عقد.. فيصل الصمعي
