خوكم فيصل اليوم وبمناسبة عطلة الربيع دار بينو وبين وليداتو ومريتو للا رقية حديث طويل عريض على المصروف والرحلات إلوين ريقو شاح.. هاو آش صار في عايلتو الولد: بابا.. بابا البو: نعم.. آش فمة؟ الولد: آنستي قالتلنا..؟ البو: انشاء الله خير.. آش قالتلكم؟ الولد: حتى شيء.. قالتلنا يلزم تجيبو عشرة الاف حق الرحلة اللي باش يعملوهالنا في العطلة لنابل.. البنت: بابا.. بابا البو: آش بيك زادة انت؟ البنت: آنستي قالتلنا البو: ما تقليش رحلة زادة كيف خوك؟ البنت: لا بابا.. موش كيف خويا.. هو ماشي لنابل.. وانا ماشية لعين دراهم البو : وقداش؟ البنت: خمسطاش دينار أكهو.. البو: يا بلاش البنت: وفمة حاجة اخرى بابا البو: آش مازال راني قريب باش نستنقط؟ البنت: لا هذي جلدية 800 مليم حق المجلة الولد: وانا 500 مليم حق المكتبة البنت: وزيدهم 200 مليم حق تنبري العصا البيضاء الولد: وأنا دينار باش نصلحو بلار القسم البنت: وانا 500 مليم مساهمة في الحفلة اللي باش تصير في عطلة الربيع الولد: و1000 حق السحار البنت: ودينار ونصف مساهمة في نادي الاعلامية الولد: و200 مليم فوتوكوبي متاع المطبوعات البنت: و500 مليم حق القصة الولد: و500 مليم حق شهايد الامتياز البنت: ودينارين حق التصاور اللي باش نعملوهم في الرحلة الولد: و500 مليم لصندوق المدرسة البنت: وكيفهم للبيت البو: يزّي.. يزّي.. راسي تعرّى المرا: انسا ما تتحدث.. تفرني على اولادك وانا لا.. البو: حتى انت آنستك قالتلك؟ المرا.. لا.. انا ما عنديش انستي.. آما عندي جارتي.. البو : آشبيها؟ المرا: عملت رحلة لبنقردان.. 50 دينار حق الكار زيدهم 500 دينار باش نسلع بيهم.. ماو جات عطلة الربيع. البو: توه انتوما الكل تفكرتوا ارواحكم ونسيتوني.. المرا: علاش نسيناك.. الوليد ماشي لنابل.. والبنية في طبرقة وعين دراهم.. وانا في بن قردان.. وانت هاك تعس على الدار (!!) البو: لا.. نسيتو حاجة.. نسيتو اللي الشهرية وفات.. واللي فاتورة الضو والماء جات.. واللي العطار قص علي القضيات والبانكة ما حبتش تعطيني افونسات.. واللي راني ندخل لداري بالسكات.. ونخرج بالسكات باش ما يشوفونيش العوينات اللي يطالبوني بالكريديات.. المرا والوليدات: آشبيك بديت تشكي وتبكي.. رانا مازلنا في بداية عطلة الربيع.. وانت من توة بديت فيها تضيع امالا آش تعمل في الصيف.. كيف يبدا المصروف على الكيف.. وتخرج من الصابون نظيف. البو: وقتها نهز ايدي للسماء.. ونعبي فمي بالدعاء يا ربي نحي الصلاعات اللي تتكلف بميات الالوفات.. وتخلينا حتحات.. ونقعدوا بقر الله في زرع الله. فيصل الصمعي
