كشف حزب "بني وطني" عن "بيانه الانتخابي البلدي". وفي ما يلي البيان الانتخابي لبني وطني والذي تلقت "الصباح نيوز" نسخة منه: "مواطنينا، اهلنا، مَالينا احنا منكم، بناتكم ، ولادكم ، نساكم، رجالكم، احنا بني وطني، توانسة كيما التوانسة الكلَ امَا قرَرنا نكونوا فاعلين ونكونوا جزء من الحلَ لا فقط ناقفوا على تشخيص المشكل .قرَرنا نعاونو الناس الي كيفنا و كيفكم، بش تونس تكون خير، لينا الكلَ ولصغارنا و لصغار صغارنا. في بني وطني بتنوَعنا، تجمعنا قناعة ورؤية مشتركة وحبَ الخدمة و البلاد ! واعين الي مصيرنا نقرَروه بيدينا بش غيرنا ما يقرَروش في بلاصتنا وحلمتنا لتونس بعزيمتنا نبنيوها حجرة حجرة. في بني وطني قرّرنا نخليو انانيتنا على جنب و نعطي من وقتنا و جهدنا و معرفتنا و امكانياتنا وقدراتنا و انقدّموا بتونس. مش الصحيح إلي وضعنا ما يتصلَحش، لكن لازم نخرجوا من موقع المتفرَج الى موقع الفاعل وهذا هو خيارنا. نعرفو الي الثنية الي اخترناها صعيبة أما نعرفوها صحيحة. هدفنا وقتلي تعثر تونس يلقفوها بناتها وولادها ويهزوها الفوق على أكتافهم. هذه عقلية بني وطني وهذا المعنى والمغزى من الرَمانة شعار بني وطني. مواطنينا، اهلنا، مالينا نحنا ملمومين شباب ونساء ورجال وكهول وشيوخ، وحدتنا في تنوَعنا كي رمَانتنا. حركتنا أفقية و نحترم بعضنا من آخر واحد التحق بينا إلى رئيس الحزب السيد سعيد العائدي. نشوفو في تونس بعد خمسين سنة كيفاش لازم تكون وعنّا برنامج عملي، مختلف و ديناميكي عصري، وفي نفس الوقت قابل للتطبيق على أرض الواقع، وكلّ مواطن يلتحق بينا قادر يضيف بصمته فيه. قيمنا العمل و الحرية و المسؤولية، اساسها المصداقية و روحها المواطنة. و المواطنة هي حقوق و لكن كذلك واجبات و ركيزة الواجبات المساهمة في تحسين المحيط الي نعيشوا فيه ولهذا اخترنا نتقدّموا للانتخابات البلدية. لانّ الديمقراطيّة الحقيقية تبدأ على المستوى المحلي والبلديات أفضل تجسيد لهذا المنوال: حتَى نطبّق مفهوم الحكم المحلي كيما أقرّه الباب السابع من دستور 2014 من خلال: التدبير الحر للشأن العام، الديمقراطية التشاركية، وترشيد الميزانية وحوكمة ورقمنة الادارة البلدية. واحنا نعتبر الظروف مهيئة للشباب وللنساء و الرجال وكلَ الي يقبل يعاون بلاده و يعطي الاضافة بش يشارك في الأخذ بزمام الأمور ويكون قوَة اقتراح و حلَ. نحنا في بني وطني نامن الي الانجاز افضل من لغو الكلام. في بني وطني نسعى لتحويل مناطقنا البلديَة لمناطق تستجيب لإنتظارات سكانها، من شباب يحب يغيَر ويدخَل حاجات ووسائل اتصَال وتصرَف نوعيَة وجديدة، وكذلك نساء ورجال عندها مقترحات جديدة أكبر من تطوير البنية التحتية، وتشعيل ضوء، ولِمْ فضلات. شباب يغزر لبعيد، يغزر لمنطقته متطورَة سليمة و متلائمة مع العصر وتطلَعات المتساكنين، ونساء ورجال قادرين على تحقيَق برامج و ترَشيد ميزانيَة. مواطنينا، اهلنا، مالينا أحنا اليوم على أبواب مرحلة جديدة في الديمقراطية ونقطة تحول في منطقتنا، هدفنا الكلَ خدمتكم وخدمة محيطنا وترسيخ الحكم المحلي. احنا اليوم على ابواب انتخابات نختارو فيها كلَنا مع بعضنا مجلس بلدي يمثَل هيئة ترجع بالمنفعة العامة، وتطمح لتوفير كل ما يلزم من اساسيات وكذلك رفاهية العيش في المنطقة: بيئيا، صحيا، تنمويا، ثقافيا وتضامنيا واجتماعيا. الوضع البلدي الحالي في كافة المجالات وضع متردي و الناس الكل تعرف هذا، وحان الوقت بش يكون عنَا تخطيط عمراني متناسق يستجيب لسياسية استراتيجية متكاملة تتماشى مع المنوال التنموي الي نختاروه لبلديتنا، كيما لازم نجد الحلول للمشاكل التقليدية المعروفة من اكبر لأصغر بلدية: من ارتفاع نسبة الطرقات الغير معبدَة، لمشاكل التنوير العمومي، الى تراكم الفضلات و ندرة الحدائق العمومية و قلة الاهتمام بالبيئة و المسالك الصحية القليلة او المنعدمة وصولا الى عدم احترام الرصيف و نقص اماكن الترفيه و مشاكل الاسواق المركزية و رياض الاطفال العمومية ... مواطنينا، اهلنا، مالينا في إدارة شؤون بلديتنا و تطبيق إجراءاتها مش باش نغفلوا على الجانب الإنساني و باش نعطيوه أهمية قصوى أثناء تنفيذ التراتيب البلدية حسب الأولويات و الإمكانيات المتاحة. كما ستعمل قائمة بني وطني في كلَ دائرة تتقدم فيها على دعم الموارد المالية للبلدية في إطار الصلاحيات القانونية الجديدة والحوكمة العصرية وحسن التصرف في عائداتها والمحافظة على المال العام، وهذا ما يكون كان بالعمل الصادق والناجع لخدمة المنطقة وخدمتكم جميعا. مواطنينا، اهلنا، مالينا احنا بني وطني واجبنا ودورنا نسمعوكم ومع بعضنا انقدّموا بتونس وقائماتنا البلدية تعكس صورة لمدننا كيما نحبَوا نشوفها غدوة. راس مالنا الخدمة ولمصداقية وبثيقتكم ننجحوا مع بعضنا وانقدَموا ببلدياتنا! احنا بني وطني بنات وولاد بلادنا الكبيرة، بتاريخها وحضارتها وثقافتها وتنوَعها وطيبة شعبها!" احنا منكم وليكم وكلَ صوت تمنحوه لينا هو خطوة انقدَموا بيها مع بعضنا بتونس
