بقلم أبو محمد سفيان يحكيو على زمان كانت فيه الذّيوبة تحكم.. وتصطاد في الحيوانات شيلا بيلا. واللّي سرقولو زادو وقعد حيّ.. يتسمّى سلّكها وكانت عندهم عادة بعد العشاء والتّمخميخ، تتلمّ الذيوبة في السّهرية، يركشوا ويوسّعو بالهم. إلّي يحكي على ملامح فريستو الخايفة قبل ما ياكلها، واللّي يحكي علىMENU غدوة واللّي يحكي على أحلى طرح مصيد عملوا... غزر واحد منهم وقال: - أمّا سي الفحل بدا يخرّج في ڨرونو (الفحل: هو ذكر القطيع و الحامي لها) - علاه شبيه؟ - بدا يحسب في روحو قويّ على خاطر ما إصطادناهوش، ما يعرفش إلّي إحنا مخلّينو على خاطر هو المسؤول على التكاثر في جلبة الغنم. - و الله كلامك صحيح، آك النّهار ما هربش كي قربنالو ويسخايلنا خايفين منّو ويشوف في روحو أكبر منّا. هاجت الذيوبة وماجت... - توّا نهجمو عليه و ناكلوه.. آش يسخال روحو؟ توّا نتحاماو فيه قام ثعلب ڨرّوم.. طايح مالسّلوم ساهر معاهم قاللهم - شكون يتخاتر معايا نجيبهولكم بساقيه حتى الهونى، هو وجماعتو وقطرة دم لا؟ - لو كان تجيبو "بقيّة حياتك الكل تاكل وتشرب من عنّا، وكلّ شيئ يجيك ليديك" - تفاهمنا، ساعة من زمان و نجيبهولكم.. أمّا بشرط تتخباو الكل وإطفّيو النّار لين نجي وتبعثو معايا زوز ذيوبا. هزّهم و مشا للمرعي إلّي فيه الغنم. كان الفحل واقف، شامخ، غزرة ثاقبة، عضلات مفتولة. دوب ما قربو شمّ ريحتهم، نبّه الغنم وحذّرهم باش يهربو مع بعضهم موش متفرّقين، كيما علّمهم. قربولو الثلاثة متردّدين، مرّة يقدّمو مرّة يوخّرو. إستغرب الفحل منهم و بدا يثبّت قبل ما يهرب. زادو قربوا بالشويّة، ظنّ إلّي هوما خايفين منّو و من جهامتو، وقف ماهربش. حب يثبّت، ضرب حوافرو في الأرض بقوّة، تفجعوا الذيوبة ورجعو التالي شويا، عجبتوّا الهدرة زاد قدّم صدرو و قدملّهم، زادو تفجعوا و وخّروا التالي، تأكّد إلّي هوما خافين منّو، تكتك شويّا قال: " نهجم عليهم ما دام خايفين منّي و نحصرهم، وإحنا كثرة وهوما ثلاثة باركا. باش تعرف الذّيوبة الكل إلّى إحنا ماناش ضعاف جدّااااااا". عجبو التكتيك. خلطّ عليهم، هرب الثّعلب و إّلى معاه، جراو شويّا و وقفو باش يطمّعوه. عيّط الفحل لجماعتو "أخلطو عليهم راهم خايفين منكم و هاذي فرصتنا باش نقتلوهم و نخوّفوا الذيوبة الكل". الغنم الكل شدّ الجرّة، الثعلب و الذيوبة يجريو، الفحل يجري و هوما يجريو وراه و موش فاهمين شيئ. فجأة وقف الثعلب و الزّوز ذيوبة و كشّروا على أنيابهم. وقف الفحل باهت "آش بيهم ماعادش خايفين ؟". هوني تبسّم الثعلب و عيّط - "شعلوا النّار" تجهر الفحل و جماعتو بوهج النّار. تلفّتوا يلقاو الذيوبة دايرة بيهم من كل شيرة و يضحكوا عليهم. تكلّم زميم الذيوبة و قال: - يقوى عليك ربّي عمّ الثعلب، كيفاش تبّعوك و حصّلتهم؟ - ساهل بارشا، ماشّيتلو في بالو إلّي إحنا خايفين منّو و مرعوبين من جهامتو، صدّق الحكاية من بهامتو و ولّى خالط علينا و يحبّ يقتلنا و تبّعوه جماعتو الكلّ، لأنّهم عندهم ثقة في تكتيك سيدي الفحل، و هو ما فيبالوش إلّي إحنا نجرّو فيه لهوني باش نمشمشوه هو و جماعتو. " فبحيث.. طلع مدكّ، وصدّق إلّي إحنا خايفين منّو".
