صررررررررخة……و ماش نفرغ قلبي يزيني الي سكت… الي معاشرني يعرفني نسكت حتى على حقي و الي يظلمني ندزو لربي و نقول بلي ماش نلقى عوج يجي نهار و ربي يعطيني على قد قلبي…اما بصراحة ملي بديت نقري السنة و انا مانيش حاسة بنكهة القراية. يمكن مني. و ماهياش عادتي لا محالة. و يمكن من الاوضاع العامة الي في المعهد الي نقري فيه خاصة…. معهد ابي القاسم الشابي طريق تنيور .. و الي في قطاع التربية عامة.. ما انحبش يتفهم كلامي على اساس اني نألب في الراي العام و نلوج على فوضى في الوسط المدرسي. الناس الكل تعرفني رصينة و مانيش متسرعة و عمري ما نحرض تلامذتي على الاضراب و الا زملائي كذلك…لكن بصراحة مصدومة من الصمت الكبير النقابي و الاجتماعي على هالظروف…اية سيدي انا نقري في معهد ما فيهش "قيم عام" واحد..نقري و نتلفت لجنابي..التلامذة البرة من القاعة …فوق الدروج تحت الدروج… قريب نلقاهم في قاعتي… الي لاهيين يتصورو سلفي و التقهقيه يجيبك مالشارع..و الي ياكلو في لمجهم و يتعاركو على طرف الشكلاطة اشكون يكملو… و الي داخلين خارجين لبيت الراحة المزروعة ب كيف الحبقة بجنب قاعتي……القيمين و الادارة موش مقصرين لكن تغلبو على خاطرهم يقوموا بمهمة ماهياش مهمتهم…تبدا تقري في قاعة على الشارع و ما تسمع كان التقزقيز متاع الموطورات و كلام التبزنيس على التلميذات و الفرانات متاع الكماين الي تحبلهم قنطرة تعديهم موش قصاص يجعلو يرفع التلامذة بيدهم……الليساي الي بناوه ماشي بالطول…و انت ماشي لقاعتك تقول ماشي لليساي وحد اخر… يعني باش نوصل من قاعة الاساتذة لقاعتي تحبلي كرهبة بزوز بيبان… و بيب بيب بيب زغرد لستاذة جاات..ههههه…كثر الهم التربوي يضحك….الوزير ..كل نهار يقوللنا حاجة ….اهو سيزيام. اهو ماثماش سيزيام…اهو نوفيام ..اهو ما ثماش نوفيام….ملا تخلويضيام………..و السداسي هاذايا نظام نتصورو ماهواش في صالح التلميذ على خاطر تعودنا على تلامذتنا يجسو النبض في الثلاثى الاول..يلنصيو و يقويو في الريتم الثلاثي الثاني و يزيدو يفهمو مستواهم الحقيقي في الثلاثي الثالث. توة ماش تولي القراية اغلبها امتحانات و فروض..و كيف يفيق التلميذ باغلاطو يلقى شطر العام الدراسي وفى و لازمو يجري ما يلحق في السداسي الثاني.. زيد عليهم دروس التدارك الي تنحات و تعوضت بالدروس الخصوصية و ينحيو للاستاذ 35%. و يجبرو التلميذ باش يدفع ثلاثين دينار …بو العائلة الي عندو زوز و الا ثلاثة يقراو منين ماش يجيبلهم المائة دينار كل شهر وقت الي هو تلقاه عامل يومي و يشقى باش يجيب حق الخبز…وليت نمشي في الثنايا ما نلقى كان المدارس الخاصة…قوس قزح..الوان و اشكال..و الشهر بالنسبة للتلميذ الواحد…قريب 300دينار.. توة هاذا ابكلو يعجب؟باهي؟ لوين ماشي قطاع التربية العام؟..انا كاستاذةتعليم ثانوي تحديدا استاذة اولى فوق الرتبة نعترف الي محاولة الاصلاح ما هياش ماش تبشر بنجاح..و ان شاءالله نكون غالطة في تقديري…علاش؟؟؟؟؟…علاش ماثماش قيم عام في معهدنا؟؟علاش المقاول و المهندس الي تبناو التصميم متاعو وبنيانو ما خافوش ربي فينا و في تلامذتنا…علاش ما يخرجش قرار اي تلميذ يتاخر يجيب ولي امرو يصحح عليه موش ياخذ بطاقة الدخول و قريب يبوسوه من فوق…و يقولو سامحنا ادخل اقرى رانا غالطين معاك….علاش ما تتراقبش المؤسسات التربوية كل عشية جمعة مالساعتين للاربعة و تتلغى الدروس الخصوصية نهائيا في العشوية هاذيكا نهار تها نحلو القاعات و قلوبنا للانشطة الثقافية خلينا نكونو جيل خلاق و مبدع و فنان. موش جيل مادي متهور و عنيف..علاش نحاو الاسبوع المغلق وقت هو يخفف علينا الضغط و نلقاو على الاقل وقت اوسع باش نصلحو الفروض و تلامذتنا تلقى كيفاش تحضر لفروضها…بالحق اول مرة نحس في قلبي معبي.. و للتوضيح…للبحارة الي يصطادو في المياه العكرة و انزهكم عن هذا. للتوضيح علاقتي بادارة المعهد و بزملائي جيدة و مندوبية صفاقس اث2..زادة سمعتنا و قدمت وعود…اما انا ما نحبش وعد …نحب حل… نحب حل…….زعمة صوتي وصل؟؟؟؟؟
