*تحتفل تونس بالذكرى الرابعة عشرة لإسناد منظمة الصحة العالمية ميداليتها الذهبية للرئيس زين العابدين بن علي يوم 26 فيفري 1996 تقديرا لسياسته في مجالَي الصحة والتنمية البشرية. - جريدة الصباح -
هذية طلعة جديد !!ةأربعطاش سنة وتونس كاملة بتاريخها وجغرافيتها وعبادها ووقتها وبنيانها.. قاعدة تحتفل بميدالية جاملوا بيها جماعة الصحة منذ عقد ونصف بن علي.. الله أعلم علاش؟؟؟ مالا أنتم شيختوها بالمناسبات زيدوا اعملوا لينا احتفال بالذكرى الخامسة لمصافحة سيادته لبوش،، والذكرى السابعة لغرسانو شجرة خوخ في مطماطة،، والذكرى ثمنطاش لتلقيه مكالمة هاتفية من تشارلز.. بما أنّ الاحتفالات نزلت لهذا المستوى عندنا اقتراح.. شنو رأيكم لو كان تبطلوا من هالفضيحة هاذي وترجعولنا احتفالات 3 أوت وصلامبو وجالطا وبرج الباف ويا سيد لسياد.. وكان تكلمنا دكّونا 10 ملايين في الحبس.
*"على إثر فوزهم بكأس أمم إفريقيا" أعرب أعضاء المكتب الجامعي لكرة اليد وكافة أفراد الوفد التونسي أكابر وكبريات المشاركون في البطولة الإفريقية للامم عن امتنانهم للرئيس زين العابدين بن علي لما يوليه من دعم متواصل للرياضة عموما ولكرة اليد على وجه الخصوص. - جريدة الصباح-
مالا لا!! امتنان ونص، حتى هو مشو شوي سيد الرئيس، خلخل الدفاع المصري وفتح ثغرات سجّل منها صبحي سعيد وزملائه عدّة أهداف حاسمة وتسرباتو على الأجنحة كانت رائعة وخاصة مردده حين يتحول إلى لاعب دائرة ثاني..المهم الولاد الكلّ كانوا في فورمة وخاصة وسام حمام وزين العابدين بن علي وعصام تاج إللي سجّلوا أغلب أهداف المنتخب.. صحّيتوا لولاد إن شاء الله نعاودوها في المونديال... تحبّوا إدَّخلوه في الشقيقة والرقيقة؟ هانا دخلناه ارتاحوا تو.
*الاثنين 15 فيفري 2010 الرئيس زين العابدين بن علي يجتمع بالوزير الأول. - جريدة الإعلان-
هذا عنوان رئيسي وبالكبير وبالأحمر وبالغامق وتحتو خط!!! هي وبعد؟؟ آخي هوما خروتشوف وكيندي تقابلوا! وإلا هنيّة ونتنياهو! طبيعي رئيس يقابل كل يوم ولعلّ كل ساعة ولعلّ كل دقيقة وزيرو الأول، آخي هو استقبل الغنوشي "R" باش تعملوه خبر رئيسي راهو قابل الغنوشي "M" ما فيها حتى مشكلة، فلّست الأخبار لهذه الدرجة؟ ما لقيتوا ما تحطوا! بطلتو من الافلام لمفبركا رجعتو للاخبار النَّيَّة.