رجعنا نهار الجمعة يا سيدي للمجموعة متاع كل عام.. ويظهرلي باش تتعدى شتوية زرقاء.. مادام للات العين رولا سعد يزين سعدها شادة صحيح باش تعملنا النسخة السادسة من ستار أكاديمي وبالتالي باش نشوفو دفعة جديدة من النجوم اللي باش تورينا النجوم في القايلة ويظهرلي السنة باش تجي بالمبّدع. ودرى آشنية الطلعة التي باش تطلعلنا بيها.. بعد العرا اللي شفناه.. والفرا اللي عشناه.. وقلة الحيا إستانسنا بيه.. والصرر ريناهم... شفنا البوس والتعنيق.. والبكاء والشهيق.. وشفناهم بالمايوهات يعوموا في البيسينات.. وشفنا الحبيب يعنق في الحبيبة والنوم حمص مع زبيب.. والبكاء والدموع.. والخروج والرجوع وشفنا الناس تصرف في الالوفات.. وميات الميساجات.. والاف الاس أم سات تقول عليهم داخلين الانتخابات.. وعرك على الانترنات.. واحد يصوّت للرجال والآخر يصوت للبنات.. ومليارات داخلين للجيوب وعرك وشبوك بين الشعوب.. تقول عليهم يتسابقوا على النجاح في الدخول للجنة.. وكل واحد ليه معجبين ومعجبات.. وتصفيات وبرايمات.. وآش باش يطلعونا المرّة هذي من طلعات.. وآش باش يورويونا من مفاجآت.. تشيح الريق واللهات.. اللهم أسترنا يا ستار من جماعة الستار.. ومن حفلاتهم ورقصاتهم وسهرياتهم ..ودميعاتهم.. وتنهيداتهم.. واسترنا من طلعاتهم.. ومن لبساتهم.. ومن أصواتهم ...وغناياتهم وكل شيء جاي من شيراتهم.. واحمي صغارنا من عاداتهم وتقليعاتهم.. برجالهم ببناتهم.. وخليهم يتلهاو بإمتحاناتهم ودريساتهم ويخبيوا فليساتهم.. اللهم إسترنا يا ستار من جماعة الستار أكاديمي وإحمينا ماللي جاي واللي باش يجي.. وربي يهدي رولا سعد.. من توة ومن بعد.. باش تعمل حويجة مفيدة.. وما تطلعشي بطلعة جديدة.. تخلينا نندبو في الخدود.. على فن الجدود.. موش تنطيط القرود.. اللهم أسترنا يا ستار.. باش ما تتحول الديار.. لبواطات في الليل وفي النهار.. قدام العائلات والاخوة والاخوات.. والعمات والخالات.. اللهم إسترنا يا ستار من جماعة الستار.. قلبي راهو بالدقداقة ومن توة شادتني الفواقة.. يا ستار أستر.. فيصل الصمعي للتعليق على هذا الموضوع:
