خويا العزيز نزار الشعري: بعثتلك هالرسالة باش نحاول نعاونك شوية في برنامجك أحنا هكة وهكاكة تلقى باش تعمل مونة متاع أسئلة تشدّك عام كامل وأهوكة وقتلّي تستحق حويجة ما عليك كان تكلم خوك ونحلفلك اللي ما نبخلش عليك. برّة خويا نبداو من البداية وخوذ شد عندك: - قدّاش من مواطن يجري على الكار؟ - قدّاش من زنقة في تونس مازالت دحسة؟ - قدّاش من واحد ساقو تكسرت وتفصعت في حفرة؟ - قدّاش من واحد عايش على الكريدي؟ - قدّاش من واحد يشهق ما يلحق؟ - قدّاش من واحد شادد القهوة من كثر ما ضربتو البطالة؟ - قدّاش من واحد ضربتو الحيوط؟ - قدّاش من واحد يخمّم في الحرقان لبلاد الطليان؟ - قدّاش نصرفو في العام على الكلام في البرطابلوات؟ - قدّاش في الليلة تبعثو من ميساجات؟ - قدّاش من مواطن تكوى بالزيادات؟ - وقدّاش من واحد طاح للغبرة والمخدرات؟ - قدّاش فمّة من دوسي راقد في الإدارات؟ - قدّاش من موظف عندو دودة الفصعات؟ - قدّاش من موظفة ضاربة 6 شهر كونجيات؟ - قدّاش من عزلوك خدمتو تتبيع البنيات؟ - قدّاش من ملاعبي استغنى من الكنتراتوات؟ - قدّاش عندنا في النهار من فنانات؟ - قدّاش من واحد بلّع روحو بالشيكات؟ - قدّاش من واحد ما يعرف كان هات هات؟ - قدّاش من واحد ضاربو الصباط؟ - قدّاش من واحد يتبع في الفضائيات؟ - قدّاش عندنا من هيفاء ونانسي في المنوعات؟ - قدّاش زعما عندنا يلعبوا بالملياردوات؟ - قدّاش فمّة من واحد وين يطيح الليل يبات؟ - قدّاش من و احد متليّع من الكراوات؟ - قدّاش من واحد عامل على مرتو صويحبات؟ - قدّاش من واحد يسهر في البواطات؟ - قدّاش من واحد عايش في الشيخات والنيخات؟ - قدّاش من واحد يملك الهامر والكات فواكات؟ - قدّاش من واحد عندو عشة ومعيزات؟ هذي خويا نزار شويّة سؤالات عمّر بيهم برنامجك في قادم الحلقات وكي توفاهم إبعثلي توّة نزيدك بالميات في جميع الموضوعات المهم ما تنساش... العنوان على جريدة «الأسبوعي». فيصل الصمعي للتعليق على هذا الموضوع: