يعطيهم الصحة ويعطيهم القوة. قداش ينجموا يتلونوا كيف أم البويا.. ويخرجوا من قشرتهم كيف الحنش.. يا دوبك الدنيا توريهم شوية ضو.. وتتحل في وجوههم البيبان.. وتلعب في إيديهم الفلوس.. حتى يتقلبوا فرد قلبة.. وما عادش تعرف وجههم من قفاهم.. يبدلوا حوايجهم.. يبدلوا مترواتهم وكيرانهم بكراهبهم.. يبدلوا ديارهم بفيلاتهم ..وبرطماناتهم.. يبدلوا سينتهم..وضحكتهم وخزرتهم وقحرتهم ..يبدلوا لبستهم.. وما كلتهم وشرابهم.. يبدلوا قهاويهم وبلايص سهرياتهم وقعداتهم.. يبدلوا جيرانهم.. ومعارفهم ولو كان يلقاو يبدلوا عائلاتهم وعماتهم وخالاتهم.. وأباتهم وأماتهم.. يبدلوا لغاتهم وكلماتهم وتلفوناتهم ونساهم.. بسكريتاراتهم.. وزميلاتهم وصديقاتهم ..يعطيهم الصحة والقوة يا خويا قداش ينجموا يقلبوا ويتشقلبوا.. دوب ما الدزة تلعب بين إيدهم.. حتى يوليو من الجماعة الهاي ونوليو آحنا من جماعة الحفتاريش... ويوليو هوما البلدية واحنا الأقعار.. ويوليوا هوما مولودين أب عن جد في رياض النصر وهو ما من أصيلي المنار ورياض المنازه وأحنا أولاد الأحياء والحوم الشعبية.. وتولى المحمص عندهم pâte en boule والزنباع pample mouses والمطبقة تولي بيتزا.. والكسكسي couscous ويوليوا بناتهم وأولادهم يحكيوا ببراد بيت ومادونا وبريتني سبيرز وتوم كروز وأحنا نقعدو نتبعو في أخبار فاطمة بوساحة وسمير لوصيف.. وفتحية برودكان. هو ما الفوق الفوق وأحنا التحت التحت.. ولا عاد يستعرفولك بعيد صغير ولا عيد كبير ..ولا مولد.. ولا عاشوراء.. أعيادهم الReveillon والvalentain saint- وموسيقتهم تولي الblouse والbreak والstreet dance وينساو الفزاني والطبلة والقصبة.. يا خويا قداش قلوبهم قوية وينجمو يقلبوا الفيستة في رمشة عين.. تقول من هزّ عباد وحطّ عباد.. وتقول فين يسكنوا بلاد.. وفين نسكنوا بلاد.. وكإنوا أولادهم أولاد.. وأولادنا أولاد آخرين وأعيادنا وأعيادهم موش فرد أعياد.. عيني ما تضرهم قداش ينجموا يتلونو... ويتبدلوا .ويخرجوا من قشرتهم وينساوا الاصل والفصل والقبيلة يعطيهم الف صحة بخلاف الصحة اللي يتمتعوا بيها.. وربي يخليلهم فلوسهم وكراهبهم وقعداتهم وفيلاتهم وبالاصاتهم وتقاليدهم وعاداتهم ويخلينا أحياءنا وحومنا ..اللهم آمين يا ربّ العالمين.
