في رحبة من الرحبات وفي جلبة من الجلبات، في حومة من الحومات نلقاو زويز عليلشات تحفونات قارنين الراس على الراس ويحكيوا بالسرقة عالسارح والعساس وهاو اش سمعناهم يقولوا: العلوش الاول: توه اش قلت العزيز؟ العلوش الثاني: تي برة ارخيني يا ولدي.. آشبيك لصقتني كيف التنبري؟ اسمع كلامي وما تندمش..ما تبيعش روحك للي يجي.. استنظف مولاك.. راك تربح يزيك مالحكايات الفارغة.. رانا مذبوحين في العيد والا في العاشوراء انت اللي حكايتك فارغة وما تعرفش تكمبن.. انا حالف بيمين ما نخرج من هالجلبة الا في 4 x 4 وساقي ما نحطهاشي في كات كات والا شلاكة بوصبع.. يزيني مالميزيريا.. مازالولي آيامات نحب نكملهم مرتاح ورايض حتى منام عيني. كان لقيت صحة ليك.. محسوب كان ركبت فيها باش تملكها والا باش تسوقها؟ على الأقل نكمل الأيامات متاعي في شيخات ونيخات مدلل كي نطيح بعايلة لاباس عليها وفي سراها تدللني.. ما تبيتنيش للجوع وللعطش.. وتعملي بيتي وحدي.. وخديمة تخدم فيّ تنظفلي وتمسحلي وتسقيني.. ونلقى وليدات يحبوني ويجيبوا يمشطولي صوفاتي ويقربطولي قريناتي.. ويحنيولي ليتي ويعطيوني السكر والسفنارية باش نولي نتبعهم. اقعد احلم هكاكة.. حياتك ديمة تحلم.. معمّل على طرف الشبوبية والنظافة اللي عندك.. تقول تحساب روحك هيفاء وهبي والا نانسي عجرم.. ما ناقص كان تقلي توة نلقى عايلة تستبناني وتعطيني اسمها وتولي تورث منها كان لزم. وعلاش لا.. الكلاب خير منا ياخي.. برّة شوفهم بابا بنظافتهم بعفافتهم.. بخدّامهم... ببيوتهم... بفروشاتهم.. بطبّتهم.. بباسبوراتهم... بمصروفهم.. بحوايجهم ببيوت نومهم بصابونهم.. بمناشفهم بكراهبهم.. بعزهم ودلالهم.. آش خصّنا أحنا.. نظاف عفاف.. شبان.. ومصروفنا قليل.. تي يزي من الهبال يا ولدي.. أحنا من أول الدنيا.. معروفين ما ايلنا كان السكينة والقرضة والساطور.. قد ما نعملو مع بنادم ما يضهرش فيه.. قد ما عطيناه صوف.. قد ما تعرّينا وغطيناه.. قد ما لبّسناه.. قدما حلبنا ورضعناه.. ما يحلى في عينو شي.. وما يعجبو كان كي يتكى علينا.. ويجزّرنا.. ويسلخنا.. ويشقنا.. ويكسرنا.. ويقددنا.. ويطوبقنا.. ويشرّحنا.. ويشوينا.. ويقلينا ويملّحنا.. ويفوّحنا ويغرس سفافدو فينا.. وينتّشنا طرف طرف.. ويشوشط روسنا وساقينا.. يمشمشنا.. ويذوبنا.. ويعصبنا.. ويمرقزنا ويصلينا.. وهو شايخ.. فارح.. يعبّي في طحشو بلحمنا.. ويسكر بقلوبنا وكلاوينا وضلوعنا.. ويعصبن مصارنا.. ويقدّد جداقاتنا وافخاذنا.. ويبداو يهنيوا في بعضهم بموتتنا. يزي.. يزي برك حممّتلي قلبي.. قدّاكش وجه كبّي وقينية.. انا نحكيلك على 4 x 4 وقرابط وحنن وعز ودلال .. وانت تحكيلي على الموت والدمومات.. آشبيك متشائم ياخي.. كون مرة متفائل في حياتك.. هي الموت جاية جاية.. علاش ما نكملش أياماتي مع عائلة خمسة نجوم.. موش نعدّي حياتي الكل من الجبل للرحبة والطباعة لعايلة شاريتني بالطلوق والا بالسلف.. نبدا متعذب معاهم من النهار الأول. الفروخ تناطح فيّ ويركبولي على ظهري كاني بهيم وفي الليل يمدولي حفنة قرط وطاسة ماء كإنّي أسير في أبو غريب والا غوانتانامو كان انت وجه فقر انا وَخَيْ وجه خير وطموح اشبيك تحبّ تبيع روحك لواحد منتّف خدّام حزام والا شهّار؟ أنا اذ اللي باش يشريني إذا ما عندوش فيلا في المنازه والمنارات والا رياض النصر.. نحك قرن في قرن ونحرن والله ما يمس مني شعرة صوف. يا خويا برة ربي يجيبلك القسم.. وخليني لاهي في همي.. عندي عيلة كاملة نجري عليها.. 3 علالش حليب وأمهم.. آش كون اللي بيهم؟ موش كيفك انت.. براسك لا تالي لا والي.. لا عرّست ولا جبت اولاد ولا أتلاد.. آما انا اللي برجو بالمرمة يموت في سطل قرط.. أسكت بركة ونقّص من البكاء والشكا.. واخزر من غادي.. شوف اك العايلة اللي هبطت من كرهبة ترعب.. شوف آك الوليد معاهم محلاه باش نبدا توة ندور بيناتهم ونلبلب عليهم وما نخلّيهم يخرجوا الا ما يشروني لو كان نعرف نذبّل عيني كيف هيفاء وهبي ونقوللهم كان لزم: معايا انا.. موش حتقدر تغمّض عينيك.