قداش قوا سعدو الحبّ ياسيدي.. الشعراء يكتبوا على الحب.. والفنانين يغنيوا على الحب.. وزيد خصّصولوا نهار يحتفلوا بيه.. وقريب يعملوه عطلة رسمية مدفوعة الأجر.. ويسمّاووه سان فالانتان قالك ياسيدي في ها النهار هذا.. الناس الكل تولّي تحب في بعضها والحب يبدا مبزّع في الثنايا.. على كلّ أنواع وأشكال وعلى كل لون يا كريمة.. الخدّام اللّي يكره عرفو يولّي نهار السان فالانتان يموت فيه.. والمواطن اللّي يكفر بريحة الكار يولّي يعشق في ركبتها عشقان.. والفار يوّلي يذوب في عشق القطوس.. آما العباد ما قال حدّ لحدّ.. يكثر البوس والتعنيق والكلام الرومانسي.. وقصايد العشق والغزل وتكثر الميساجات والآس آم آس.. والهدايا وباكوات النوار الأحمر.. ودبابز الكونوليا.. واللّي مستانس يهبط كلّ يوم هو وخطيبتو ريش.. يعملوا هدنة.. واللّي كلّ ليلة عرك ومعروك مع المدام على المصروف وسهريات القهاوي ينسى خلافاتو، واللّي يشوف في مرتو كي الشيطان 364 ليلة في العام يولي يشوفها ملايكة ليلة السان فالانتان.. واللّي عاملة صاحب على راجلها تعمل راحة ليلة السان فالانستان واللّي عامل صاحبة على مرتو يعطيها كونجي ليلة السان فالانتان.. وما عاد تعود تسمع.. كان يا عزيزتي.. ويا عزيزي.. وياحبّي.. ويانور عينيّ وياروح قلبي.. وانت أوّل وأخر حبّي.. وفين نحطّك ياطبق الورد.. التبشبيش.. والدلول.. والعسول.. وحتى اللّي مكهّب على السبعين يوليلك ليلة السان فالانتان نشاط وحيوية واللّي مكهبة على السبعين توليلك شباب تقولش عليها سعاد حسني وماناقصهم كان يركبوا على بيسكلات.. في السان فالانتان.. الناس الكل يوّليوا عشاق أما حدّهم هاك الليلة يا دوبك يطلع الصباح.. ترجع ريمة لعادتها القديمة.. يرجع العرك والمعروك وشريان الشبوك وفك إيدي من شوشتك.. يرجع كل واحد لصاحبتو.. ويرجع يشوف في مرتو شيطانة.. وترجع المرا تفركس على وحيّد جوناس خير من الكبة التي ما شافت معاه نهار خير.. وترجع الوجوه كيف بوكشاش.. ويرجع التكشبير والتنبير.. ويذبل الحب كيف ما تذبل وردة السان فالانتان مع طلوع الصباح.. يتنسى الحب والبوس والتعنيق وقصايد الغزل.. وأشعار الحب.. وترجع تطلعنا الكلبة بنت الكلبة.. على كل من هب ودبّ.. السماح مع السان فالانتان.. ومن عيد الحب.. او عيد الكذب يارب.. فيصل الصمعي للتعليق على هذا الموضوع:
