أنا خويا يجيني الربيع نتفرهد.. وتزهالي في النوار.. دوب ما تدفى الدنيا وتطلع الشمس.. ونشوف الورد والحبق والنوار كيفاش زهّر ونوّر.. .. والبدنّات تولّي من السخانة تفوّر.. والفورمات تتكوّر.. والبدنّات تتصور وسبحان من صوّر.. وتولّي محطات الكيران قاعات لعرض الازياء ومحطات المترو ستوديوات متاع ستار اكاديمي وتزغلل عينيك من المحزوق والمشقوق والفونت اللي من فوق الفوق.. وتلعب عليك الدوخه من ريحة البارفانات والكلونيات والماكياجات.. وتشوف البنيات القنفيدات خارجات كاينهم عروسات خارجات من حوانت الحجامات.. وتتمتع بالميني جيبات.. والبوديات.. وتشوف كل شيء اللحم شيلة بيلة يا بو العيلة.. تفرّج وما تمدّش ايديك وما تحسبوش رزق البيليك.. شوف بعينك وموت بقلبك.. ما احلاه الربيع.. كيف تشوف الانتاج المحلي في الثنايا كانك في نيويورك والا باريس والا روما والا لندن.. على يمينك هيفاء وهبي على يسارك اليسا.. قدامك روبي.. ووراءك نانسي عجرم.. قنابل وصوارخ متحركة تقوليش عليك تمشي في حقل متفجرات موش في شارع الحبيب بورقيبة والا في اللاك والا في النصر.. هاو منة وردة ومن غادي قرنفلة.. هاو ياسمين هاو نوارة.. جماعة بالزوز.. جماعة بالحارة.. وانت تدور وتشم حتى لين قلبك عليك قريب يغم.. ما احلاه الربيع.. وما احلاها الشمس كيف تطلع..والبنيات تفزع.. للمحواسات والسهريات باش نجمو احنا نمتعو العوينات.. ونرجعو شوية من الشباب متاعنا.. كي نشوف السلع مفرتة في الجناين والقهاوي والشوارع.. ويبدا واحد طالع هابط.. يقلب ويشقلب.. ويغمز.. ويبزنس.. ويغزل ويتغزل.. ما احلاه الربيع يا وخياني.. نبدا نستنى فيه بالدقيقة والدرج.. خلي واحد يرجع جوناس.. ويتمتع.. ويتخلع.. ويتشخلع.. قولو معايا.. ما احلاه الربيع.. فيصل الصمعي