أعلنت كاتبة الدولة للشباب سابقا فاتن قلال عن استقالتها من حزب افاق تونس، وذلك في تدوينه لها على صفحتها الخاصة على "الفايسبوك". وفي ما يلي ما دونته قلال: "شخصيا انخرطت في السياسة و كان طموحي أني نساهم في بناء مشروع سياسي تونسي, مهما كان الموقع, حساباتو كبيرة, مشروع الهدف الأساسي متاعو بناء تونس ديمقراطية مزدهرة, مبنية على منظومة سياسية متطورة قادرة أنها تحقق نمو اقتصادي و استقرار اجتماعي, مشروع يحقق السعادة للجميع و خاصة يعطي فرصة للأجدر. لكن مع الأسف حتى لتو السياسة في تونس تنحصر في إطار الحسابات الضيقة, سياسة مبنية على الطموح الشخصي, سياسة الهدف متاعها الأساسي كيفاش نولي معتمد, والي, وزير, رئيس حكومة و إلا رئيس دولة, و إذا المسار ماهوش مطاوع هالطموح, نكون مستعد باش نتكتك باش نكسر و نطوع للي نحب عليه بغض النظر على المصلحة العامة. صحيح برشة يظنوا الي أحنا قاعدين نفشلو برشة بداو يفقدو الامل, اني رأيي مخالف, صحيح برشة شخصيات و أحزاب خذلتنا برشة فشلت في أنها تحمس الناس و تقدم برامج واضحة و عملية و بعيدة على الشعبوية, و لكن الأمر هذا عادي حسب رأيي لأنه اغلب الناس هاذي جاية من المنظومة القديمة إلي الشعب ثار عليها و هنا نقصد حكما و معارضة, الناس هاذي غير قادرة أنها تفهم متطلبات المرحلة على خاطر تربات على اللعب في الحسابات الضيقة, الي في الحكم كان يلوج كيفاش يدبر راسو و الي في المعارضة يعارض باش يعارض عمرو ما شاف روحو نهار يحكم و الباقي ما كانوش يحلمو بنهار كيف هذا أصل. لكن كيف نشوف الي رئيس الحكومة عمرو 41 سنة من الجيل الي انخرط في السياسة بعد 14 جانفي, كيف نتفرج كيما البارح في الحوار التونسي على عبد القدوس السعداوي كاتب الدولة للشباب, كيف نسمع ياسين العياري رغم كل اختلافاتي معاه في ميدي شو, كيف نحكي مع شيماء بوهلال الرئيسة السابقة لبوصلة و معز عطية من كلنا تونس و قيس علاني رئيس المخبر الاقتصادي في افاق تونس و عديد القياديين الشبان في السياسة او المجتمع المدني الي عمارهم ما تتعداش الاربعين سنة نحس الي احنا نبنيو في حاجة كبيرة و جاء الوقت باش نفرضو رواحنا. الجيل الي سبقنا يحاول يحسسنا بالذنب يقولولك أحنا الي وصلناك و انتي مدين لينا, اشبيني عمري ما ريت ياسين براهيم يشكر في الباجي قايد السبسي الي سماه وزير نقل في 2011 و ردو شخصية سياسية, اشبيني عمري ما سمعت مهدي جمعة يقول الي هو مدين للشيخ كيف حطو وزير الطاقة و بعد رئيس حكومة, على خاطر في مخو هو جدير بهالمناصب اما احنا الشباب مازال علينا بكري, ما ينجموش يستوعبو الي احنا وصلنا على خاطر خدمنا و كيما استعملونا باش يزينو بينا المحافل احنا زادة من حقنا انا نفرضو وجودنا و نطمحو للقيادة. تو مدة علقت نشاطي رفقة العديد من القيادات في أفاق تونس تعبيرا عن رفضي لبعض الممارسات إلي ما تخدم كان الحسابات الضيقة أملا مني انو السيد رئيس الحزب يستوعب الموقف و يتدارك الموضوع و ما راعني إلا اني نسمع نفس لكلام متاع شكون وصلك, ما راعني الا انو السيد ياسين براهيم يستغل الموقف باش يقصي جميع المناضلين المتعاطفين مع هذا المسار, يعني لا يكتفي بتجاهل القيادات و إنما حتى القواعد موش لازمينو, ما نعرفش شنوة نوعها السياسة هذه, اما متأكدة إلي هي ما عندها وين توصل و لذا أعلن استقالتي من الحزب نهائيا لأنه لا جدوى في إهدار الطاقات أكثر خاطر حديثك مع الي ما يفهمكش ينقص مالعمار. المحطة الانتخابية الجاية و هي البلدية باش تكون هامة خاطر تمكن المواطن باش يعطي فرصتهم للأشخاص الي يستحقو, لا للأحزاب, الألوان ما تهمش بقدر قيمة الأشخاص إلي على القائمات, اني باش نحاول نساند جميع الناس الي نرا فيهم كفاءة و خاصة قدرة على الهام الناس و اعطائهم امل مبني على الواقعية و الصراحة و الحلول الفعالة. اما 2019 فللحديث بقية, السياسة المبنية على الحسابات الكبرى لازمها نفس طويل و إصرار و عدم حياد عن المبادئ مهما كان الثمن و أني هذا الطريق إلي اخترتو و إلي نحبو و إلي يحمسني."