في بالكم اللّي في تونس دخلنا موسوعة غينيس للأرقام القياسية في عدد المهرجانات الفنّية والثقافية.. اللّي تبدا من مهرجان قرطاج حتى مهرجان الهريسة المرحية.... ومن مهرجان البسيسة لمهرجان أمّك حورية وفي كلّ ولاية وفي كلّ عمادة ومعتمدية ودشرة وبلدية.. وقالك ياسيدي كلّ مهرجان عندو خصوصية.. وجذور تاريخية.. من مهرجان الفلفل حتى لمهرجان السيدة المنّوبية.. وكل مهرجان عندو جمهورو.. وجاويه وبخورو.. من مهرجانات المليارات لمهرجانات بودورو.. وكل مهرجان عندو لجنة ثقافية.. ولجان فنّية.. وجماعة متحمّلين المسؤولية.. يخمّموا ويكنبصوا باش مهرجانهم يوصل للعالمية.. تعدّيه القنوات الفضائية ويحكيوا عليه في الصحف ووسائل الإعلام المحلية والجهوية والوطنية.. واللّي كلّ مهرجان يشكر السلط المحلية والمعتمدية والبلدية واللّجنة الثقافية الجهوية على دعمها اللا محدود لهذه التظاهرة الثقافية اللي تبدا بالمزود وتوفى بالأغنية الشبابية. وكل مهرجان من قرطاج للروحية يحيّيوا المؤسسات الإقتصادية على مساهمتهم في الميزانية اللّي خلاتهم يجيبوا أحسن الأصوات الفنية واحسن الفرق المسرحية من العرس التقليدي حتى لبوسعدية وكل مهرجان يوعد الجمهور بالنجاح وبسهريات للصباح على أنغام أضرب الحمري والفزّاني مرتاح.. وكلّ مهرجان غايتو خدمة الثقافة.. بعيدا عن الإسفاف والسخافة.. واللّي الإفتتاح باش يكون مع نجاة الصغيرة والإختتام مع جانيت العرافة.. ولهذا ننصحكم باش تشدّوا حزاماتكم.. وتحضروا حنّيناتكم.. وتتراناوا على شطحاتكم.. وتحفظوا غناياتكم.. الرجال يحضّروا دبيبزاتهم.. والبنات يقصرّوا جيباتهم.... ويكبسوا مسلاناتهم ويحضروا لافتاتهم.. والأولاد يهزّوا درابواتهم... باش يحضروا مهرجاناتهم.. ويقابلوا فنّانيهم وفنّاناتهم.. ويركزوا معاهم على رنّاتهم.. ويركّزوا على لبساتهم.. ويعاندوا موضاتهم.. وتقليعاتهم.. وهبلاتهم.. شدّو ارواحكم.. جايكم صيف.. يعمل الكيف.. الكلّو سهريات. وحفلات.. وناس تدفع في الدينارات وناس تقبض في الدولارات.. والبوربوارات.. وناس تعبّي وتخزّن وناس حالها تحزّن.. شدّو أرواحكم يا جماعة قرطاج والحمّامات.. هاي جاتكم المهرجانات.. والشيخات وإنتوما ياجماعة مهرجانات الفتفات.. عيشو ديما على الفتات.. وعلى الفنّانين الحتحات اللّي عايشين على زوز فرنكات.. وقولو تحيا المهرجانات.. فيصل الصمعي للتعليق على هذا الموضوع: