شهر ونصف مللّي بدات القراية.. شهر ونصّ وفمّة تلامذة ماعندهمش معلّمين.. وماعندهم جدول أوقات.. شهر ونصف يا أسيادي.. واللّي يقرا الصباح ما يقراش العشية.. واللّي يقرا العشية مريّح الصباح.. شهر ونصف.. وفمّة تلامذة ماقراوش حرف فرانساوية.. ولادرس عربية.. مرّة المعلّم غايب.. مرّة أنستي في اجتماع.. شهر ونصف وفمّة تلامذة يمشيوا مع الماشيين ويجيوا مع الجايين.. هازّين كراطب.. جايين بكراطب.. آش عطاووكم ماعطاوناشيء.. آش قريتو؟.. ما قرينا شيء.. أنستي مريضة آنستي حبلى.. سيدي عندو اجتماع.. في التفقدية.. في المندوبية.. في.. في.. في.. شهر ونص والكتب والكرارس مازالو جدد ما تحلّوش.. ما تقطعوش معناها ما تقراووش.. تمشي للعساس يقلّك شوف سي فلان تمشي لسي فلان يقولّك شوف المدير.. تمشي للمدير يقلّك أنا بإيدي نستنى.. عندي نقص وقاعد نستنى شهر ونصف وعطلة سبعة نوفمبر على الأبواب وأولادنا مثل الحمار يحمل أسفارا.. وربي يسترلا في إخر العام يجيبو الكلّهم أصفارا.. وإلا ترصّي كي العادة في الأوتيد المجنون باش ينجمّوا يخلطوا يكملّوا البرنامج. وهات يا مطبوعات.. وهات ياملفّات.. وهات.. وهات.. وهات... والنّافع يجيبو ربّي.. وإيّاك تتكلّم وإلاّ تحتج.. يحطّوك في الحنديرة.. وأولادك في الحنديرة.. وكان سكت يا ويح.. كان تكلّمت ياويح.. الريق يشيح.. شهر ونص وحتى شيء ما كمل.. كان الأدوات والدّبش هاذوكم لازم يكونو كاملين من الألف إلى الياء.. من قصص السلسلة الخضراء وإنت ماشي.. والماشي للسدرة الزيتونة أولى بيه.. أولى حتى من النشيد الوطني اللّي بعيني شفت بعض المدارس الإبتدائية تتملّح طول وعرض منّو.. شهر ونصف ماللّي بدات القراية ومازالت كلّ يد ما خذاتش أختها.. وما نيش عارف وقتاش باش تأخذ كلّ يدّ أختها.. أنا واحد من الناس نستنى في الصلاعة باش كلّ يد تاخذ أختها(!!) للتعليق على هذا الموضوع: