بجاه ربّي لا تحشروا ربّنا و خالقنا و مولانا في خزعبلاتكم ...لا تحشروا المولى بعظمته و قداسته في سفاسف أموركم و تهريجكم و عبثكم...البارح في الأيّام المغنّي الشّعبي فوزي بن قمرة يؤثّث برامج الرّداءة في قناة سامي الفهري و هو رأسين في شاشيّة مع نوفل الورتاني ...برشة بلادة ...برشة ركاكة...برشة رويّق فارغ...برشة مساطة... و المسألة ذوقيّة و للنّاس فيما يعشقون مذاهب...يتخاصم الورتاني مع الفهري فيتحوّلان إلى عدوّين كلّ واحد منهما يتصيّد الآخر...يتخاصم بن قمرة مع الفهري فيطلع بن قمرة في برنامج الورتاني و يتحدّث عن حساب الآخرة و الوقوف بين يدي اللّه و يعرض علينا خطاب ديني و الدّنيا و الآخرة...بجاه ربّي احشموا على ارواحكم...البارح في الأيّام و انت سي بن قمرة تتجلطم و تتمقعر و رويّق فارغ و هذي أمورك ...و هذه قناعاتك و اختياراتك...اليوم بعد خصامك مع الفهري تبدّل اللّغة و خطاب الرويّق الفارغ مع بيّة الزّردي و أتباعها يتحوّل إلى خطاب ديني و القيامة و الحساب و الآخرة ...بجاه ربّي كونوا رجال و العبوا قدّام دياركم...و اتركوا علاقتكم بربّكم شخصيّة و ذاتيّة و لا تستعملوا الدّين سيفا ترفعونه متى تشاؤون و تخفونه متى تشاؤون...بجاه ربّي تستخفّون بالخلق و تستغبونه و تسخرون منه بسذاجتكم و بلادتكم و مساطتكم...فاتركوا الخالق... و العبوا امام بيوتكم...تخاصموا...تعاركوا بينكم و اللّه لا يردّ فأس على هراوة...و لكن كونوا صادقين مع أنفسكم و كونوا رجال و لا تستعملوا الدّين و ربّي في معارككم..تحشروننا في سخافاتكم و لا تخجلون من تصفية حساباتكم مع بعض في بيوتنا " بصحّتكم" لأنّه لا دخل لنا في عركة بين بن قمرة و فتاته في قناة الفهري ...و لكن تريدون استبلاهنا بخطاب ديني فيه الجنّة و النّار من أجل عركة بين بن قمرة و طفلة من بنات الفهري...ياسر عاد...و من الآخر جميعكم تصحّ فيكم ما قال كبارنا ...ما خير الجدري كان البقلة..