النائب السابق في المجلس التاسيسي ابراهيم القصاص بدا يكتب على صفحته الرسمية هذه الايام علاش باش انحتفلوا وانزغرتوا. بالك على كبان سعودنا . والا باش انزغرتوا عالناس الي جات من برة وهزت الملمة والي فمة. ياخي باش نحتفلوا وغنوا للناس الي هردونا بعد ما يسمى بالثورة ماهي الثورة طلعت بقرة وحلبوها الجماعة حتى ضرحها المسكينة قام يجري بالدم . هاهي خمس سنين تعدت بالك تونس بدت جنة واني ما نعرفش . فقر ووسخ وزبلة وبطالة وارهاب وزيد سرقة في سرقة . حاجة واحدة محيرتني كيفاش بن علي قعد 23 عام وهو شاد هالهم الكل . الطرابلسية سراق امالا عمركم شفتوا طرابلسي سرق عطار والا خضار والا عامل يومي والا حتى موظف. اتي الموظف الي كان يبنبي بشهريته تو قريب يولي يساسي المسكين . باهي عمركم سمعتوا الطرابلسية قالوا رانا نخافوا ربي ماهو كانوا شايخين فيها عرض وطول والحق امتاع ربي الزوالي كان عايش في جرتهم على الاقل هاوينهم مسيطرين على كل شيء والدنيا كانت رخيصة وتو يا بابا مع جماعة السبحة وجماعة الوسكي . كالمناشير طالعين واكلين هابطين واكلين . لا وزيد تحالفوا عاد انت اسرق واني تو نستغفرلك وفي الليل نسكروا جميع وان الله غفور رحيم . تو كيفاش باش يحلها الشعب عاد . ملا ثورة انتاع برويطة وحلنا في جد بوها . صدقنا ارواحنا بالي احنا عملنا ثورة ياخي طلعنا بقر وثيران.وكل برويطة وانتم امروطين…