حالة من الحزن خيمت الليلة على شبكة التواصل الاجتماعي الفايسبوك في صفاقس خاصة بسبب رحيل ميساء في عمر الزهور بمرض نادر واليكم اهم ما كتبه اصدقاء الفقيدة عن سبب موتها ” ميساء ماتت البارح، كلنا تشوينا عليها، و اليوم كي زدنا فهمنا علاش و كيفاش زدنا تقهرنا و تشوينا… ميساء ماتت خاتر مالقاتش بلاد ترعاها، و مالقاتش عباد ترحمها.. هي ماتت و برشا قبلها و بعدها مزالو بش يموتو كيفها.. ميساء عندها حالة مرضية خطيرة تتسمّى anevrisme تستوجب تدخل طبي عاجل و عملية جراحية سريعة. الطُبّة عطاوها مُهلة شهرين، في الشهرين اذوكم لازمها تعمل العملية، كان تفوتهم… تموت.. ميساء و عايلتها التجؤو للطب العمومي في الأول و عمّلو عالدولة، ياخي، قالولهم لازم تستناو تلاثة سنين، اي نعم تلاثة سنين!!!!!! تلاثة سنين بش تخلط لدورك و تعمل عملية عاجلة! يخي، مالقاو بيها وين، مشاو للخاص، لقاو الي العملية تتكلف عشرات الملايين الطبّ ولّى بيعة و شرية… منين بش يجيبوهم في شهرين؟؟ حاولو يبيعو، حاولو يلمو… اما ماخلطوش.. وفاو الشهرين و ميساء البارح توفات توفات على خاطر مالقاتش بلاد اتداويها، و على خاطر ماعندهاش فلوس اتداوي بيهم روحها… الفقير يموت في البلاد هاذي، المتوسط زادا يموت كيف كيف، الحياة فقط للأثرياء.. الله يرحمك…
