برشى ناس يقولو انو الثورة عندها عامين و ما رينا منها شي ؟ هذاك علاش حبيت نكتب المقال هذا ونجاوب الناس هاذم و نقوللهم انا شنو ريت مالثورة و نذكرهم ببعض الحاجات اللي غفلو علاها ..وباش نحكي بالعامية خاطرها تعبر اكثر و يفهموها الناس الكل .. أنا ريت التونسي تحرر من الخوف و معادش يمشي و يتلفت وراه , ريت التونسي معادش يوشوش لصاحبو ويقولو نقص صوتك الحيوط عندها وذان , ريت التونسية ما يجبرها حد باش تصحح على التزام بخلع الحجاب اللي كانو يسموفيه باللباس الطائفي , ريت ألاف العائلات معادش يهزوا في القفة للسجون باش يزورو سجين سياسي , ريت اطفال في عمر الزهور معادش يعدوا العيد الكبير و الصغير يبكو على خاطر بوهم في سجون بن علي ظلما و عدوانا , ريت الشباب التونسي المهتم بالسياسة و الشأن العام معادش يستحق “بروكسي” باش يواكب اخبار بلادو من خلال موقع tunezine” ” متع المرحوم زهير اليحياوي و الا ” “tunisnews متع المهدي الغربي , ريت الشباب التونسي معادش يحط في صفحتو الشخصية متع الفايسبوك “فوتو دبروفيل” متع شخصية مشهورة و الا لاعب كورة خاطر يخاف كان يحط صورتو يكلكفوه , ريت الاعلام و لى يسلط الضو على كل شي , ريت ناس كانو من المغضوب عليهم في العهد البائد ولو يعدو فيهم في التلفزة, ريت الاعلام بدى يتحرر من القيود متاعو , ريت برشى بلاتوات في التلفزة مهتمة بالسياسية و الشأن العام بعد ما كانت تهتم كان بالرياضة , ريت الشباب التونسي اللي حبو يشغلوه بالكورة و الفن ولى يتابع في السياسة و يعطي رايو , ريت الشعب يتكافل مع بعضو باش يعاونوا اخوتنا في الشمال الغربي بعد الفيضانات و الثلوج , ريت الشعب التونسي يترفع عن مشاكلو الشخصية باش يعاونوا اخوتنا الهاربين من بطش القذافي . ريت خالد مشعل و اسماعيل هنية في تونس ، ريت العرب استطاعوا جبر الصهاينة على وقف اعتداء غزة ، ريت خالد مشعل يسجد في غزة بعد 37 سنة تغريب ، ريت مصر و ليبيا و اليمن و قريبا سوريا تحرروا من طغاتهم ، ريت حسني مبارك و ولدو في الحبس و يهزو فيه للمحكمة على نقالة , ريت وزير الخارجية التونسي يستدعي السفير الفرنسي و يلومه على التدخل في ما لا يعنيه , ريت وزراء توانسة مشوا لغزة لمساندة اخوتنا في فلسطين , ريت اهتمام دولي و احترام كبير لتونس على ثورتها المباركة . ريت اكثر من 30 الف عائلة كانت تعاني من الدكتاتورية و السجون و المراقبة الادارية اصبحت الان تشعر بالمواطنة ، ريت جلادي تونس و طغاتها هاربين كالفيران ، ومنهم شكون شد الحبس , ريت المساجد تعج بالمصلين و ما يقيدلهم حد اساميهم ، ريت المرأة التونسية حرة تلبس النقاب أو الحجاب او ما دون ذلك ما يقلقها حد . ريت انتخابات غير معروفة النتائج مسبقا , ريت الشعب التونسي شاد الصف باش يحط صوتو في الصندوق بعد ما كان صوتو يتحط من غادي لغادي . مازالت برشى حاجات ما نستحضرهاش تو .. المهم ما يلزمناش ننظروا بمنظار ضيق ” من كان في نعمة ولم يشكر خرج منها ولم يعلم “
