فمة عباد.. يفطروا بالدنيا ويتسحروا بالآخرة.. لا يكلوا لا يملوا لا يشبعوا.. لا يقنعوا.. لا يستقنعوا.. يعديوا حياتهم الكل هات شاشيتك هات صباطك.. نهار اللي يعمل مليون تلقاه يخمم في خوه.. ويعدي حياتو يحسب.. ويقلب ويتشقلب ويحط شاشية هذا على راس هذا.. أعطيه بركة يربح.. ويكبّر في الصرمية باش الباكو يولي إثنين.. والميا تولي ميتين.. والمليار يولي مليارين.. تلقاه قاتل روحو في الخدمة.. يخدم كيف الSMS أربعة وعشرين ساعة على أربعة وعشرين.. لا كونجي.. لا راحة لا نهار أحد.. لا عيد.. لا موسم.. لا فيشته.. لا ليل لا نهار.. حتى كيف يرقد يقعد مخو يخدم permanance ويشد عليه الreleve يعدي حياتو الكل وهو طالع هابط في حساباتو ومشاريعو.. وآفارياتو.. يخمم في كونتاتو.. ودفتر شيكاتو وناسي حياتو.. ومرتو.. ووليداتو ..هكاكة تتعدى أياماتو.. ويشيبو شعراتو.. ريقو شايح.. حتى يبان لهاتو.. ونهارت اللي يتوفى.. ومولى الامانة يهز آمانتو.. يمشي وحدو ويخلي فليساتو.. وملياراتو.. وديارو وقصوراتو وحساباتو ودفتر شيكاتو.. باش يتعاركو عليهم وليداتو. وفمة عباد.. عاش ما كسب.. مات ما خلى.. عايشين فيها كيف ما جاء.. اللي جايبو النهار مديه الليل.. واللي يصورو..يصرفو.. وبوزيد مكسي بوزيد عريان.. يصرف ويفرني وبرة قيد عالكرفي.. تقلو علاش؟ يقلك الدنيا فيها الموت.. وآش كون اللي هزّ معاه حاجة للقبر؟ ديما بايعها بلفتة واللي فيها ما يفريها.. لا عندو حسابات لا عقابات.. ولا حتى دفتر شيكات.. ولا مليارات ..ولا قصورات..وفي الليل يحط راسو ويرقد ويبات.. متهني بفقرو.. خير ماللي يبات بفلوسو موسوس.. واذا صاحب الامانة هزّ آمانتو.. ما يخلي شي وراه.. ولا أولاد يتعاركوا عاللي خلاه.. في الجبانة.. الناس الكل كيف كيف.. حد ما يهز حاجة معاه.. كان زوز ميترو قماش.. وقطنة.. وسعدك يا فاعل الخير.
