آشكون يبدا كيفي مكهب على الخمسين وما يتمناش يكون في العشرين.. في هالوقت وهالزمان.. آشكون ما يتمناش يكون شبيب صغير.. كي النحلة من نوارة لنوارة.. ومن وردة لوردة.. آشكون ما يحبش يرجع لصغرو وشبابو.. وذكرياتو.. واحبابو.. ويغني البارح.. البارح.. كان في عمري عشرين.. عشرين.. آه.. لو كان جيت اليوم وعمري عشرين.. ونشوف اللي نشوفو... ونعيش كيف.. شباب هالوقت شباب الانترنات.. والشات.. شباب الباسات والكات فواكات.. والسهريات.. والبواطات.. شباب الكوبلوات شباب الليسيات.. والجامعات.. والقنفيدات اللابسات الدجينات الحاطات الحطات.. المرغدين بالماكياجات.. شباب الكليبات والفنانات العاريات القاريات.. آه.. لو كان يرجع بي صغري ونغمض عيني ونحلها ونلقى روحي فرخ عشرين.. شعري احمر مصبوغ.. ووجهي مدبوغ.. وفي وذني بلوطة.. ديجيني طايح.. نتبختر.. نتشخلع.. نتدلع.. لو كان جاء عمري عشرين.. راني ضاربلك قنبلة كيف ما نعرف آنا.. تدي الزكاة والعشر.. بخدمتها.. بكرهبتها.. بفيلتها.. السروال المحزوق.. والجيب المشقوق.. بدنها هيفاء وهبي.. وخدودها نانسي عجرم وشطيحها روبي.. وتزعبينها متاع اليسا لو كان يرجع عمري عشرين.. نطير ونقز بجنحين.. ونتملح من الوظيف اللي خرجت منو نظيف،، ونطلع فنان كل ليلة بمهرجان.. يتكالبو علي البنّيات.. ويغرقوني بالبوسات ونغرقهم بالاتوغرافات.. ونغرق في الكاشيات ونصور.. الملايين بالميات.. لو كان جاء عمري عشرين.. نشارك في السوبر ستار.. ونعمل احسن آفار.. في حلمة نولي فودات لو كان جاء عمري عشرين نطلع ملاعبي كورة.. نصحح الكنتراتوات.. بالاف الدولارات ونهز الكوبات والبطولات. ويهتفوا باسمي في الستادات ونركب الميغان والباسات.. ونهرب من الكيران والميتروات لو كان يرجع عمري عشرين لاما نعمل البطيط.. اما خسارة وانا مكهب على الخمسين نقعد ديما نحلم ونغني البارح البارح كان في عمري عشرين.. عشرين.. ويعيش الشباب في عيدو الحنين. فيصل الصمعي
