اكدت القاضية المتقاعدة كلثوم كنو حسب ما رصدته الصريح اونلاين قبل قليل انها لا تقوم باي دور لا خفي ولا علني في قصر قرطاج واوضحت قائلة : الجماعة اللي قاعدين يروجو اللي أنا نلعب في دور في القصر من وراء الستار . نقلهم كلثوم كنو ما تلعبش في ا لخفاء أما تساهم في الجهار . شدو عندكم. أولا آخر مرة حطيت ساقيا في قصر قرطاج كان في ماي 2013 بمناسبة انتهاء اعمال الهيئة الوطنية لاصلاح الاعلام والاتصال وتنصيب اعضاء الهيئة المستقلة للاتصال السمعي والبصري. ثانيا حرم السيد رئيس الجمهورية هي زميلتي في القضاء وأنا منذ جانفي 2018 خرجت في التقاعد المبكر. وما نتذكرش نهار حكيت معها لا فيرالمباشر ولا بالتلفون ولا بأي وسيلة أخرى وما نتذكرش حتى تقابلنا جملة لا في المحكمة ولا خارجها لا وقت كان زوجها يدرس في الجامعة ولا وقت أصبح رئيس مستشارة السيد رئيس الجمهورية مدام عكاشة شفتها في الصور الي تنشرو فيها في الفايسبوك . ولا عمري تقابلت معها ولا عندي بها حتى علاقة لا في السياسة ولا خارجها. نجيو توة للسيد رئيس الجمهورية كيما ذكرت مرة في تدوينة سابقة . ما نتذكرش نهار حكيت معه حتى لما كنت ندرس في كلية الحقوق. وما نتذكرش نهار عرضني في الشارع لا قبل الثورة ولا بعدها . وعلى فكرة لازمكم تفهمو يا جماعة يالي دوركم نشر الأكاذيب اللي راهو موش عيب كان تجي فرصة ونحكي مع الرئيس . أما تأكدو ما نعمل شي في الخفاء لا كيف نقابل الرئيس أو غيره. ونختم ونقوللكم راهي حالتكم حليلة زيدو واصلو في كذبكم يالي ما تحشموش
