جل المصاب وزاد همنا الخبر حل المشيب بنا والغم والسهر شل القلوب أسى والبين مثلمة والأرض مظلمة يجتاحها قتر يمضي الزمان على هم أقلبه لو صب في جبل لصدع الحجر والله كنا عايشين بحسك .. نقولو العقربي مازال بيناتنا ومازالت البركة .. اليوم قالولنا البركة فيكم في العقربي .. آمس في الأيام وأحنا صغار كنا نكتبو إسمك على الكورة اللي نكورو بيها في الحومة .. عشقناك .. حبينا لعبك .. حبينا حمادي الكوارجي الفنان ساحر الأجيال اللي تونس لكل تحلف بإسمو و اللي ما فماش ستاد فيك يا تونس ما خلاش فيه بصمتو .. حبينا حمادي الإنسان الطيب الرقيق الخجول المتواضع .. أيامات لتالي كنا نقولو حمادي ربي يشفيه .. اليوم نقولو حمادي ربي يرحمو .. اليوم انت مشيت وخليت لوعة وحزن في قلوب الصفاقسية الكل .. لا .. في قلوب التوانسة الكل اللي يعرفوك من قريب واللي يعرفوك من بعيد وحتى اللي عمرهم ما قابلوك وفقط تفرجو فيك .. أما زادا خليت ذكريات جميلة مطبوعة في قلوبنا ما يمحيهاش الدهر مهما طال .. حمادي باقي حي في قلوبنا مهما حيينا وسيرث حبه من بعدنا أجيال و أجيال كيما ورثنا حب الجمعية. الله يرحمك يا العقربي .. وداعا يا أسطورة ..