منجي باكير من الثّابت قطعاأنّ الشّعب التونسي ، شعب كريم ، طيّب و بحْبوح ،،، لكن بالمقابل زادة أنّ ها الشّعب عندو خاصّيات ينفرد بيها و تكوّن شخصيتو المميّزة ، و هنا باش نحكيوا على الشّخصيّة التونسيّة النوعيَة .. يعني الشّخصيّة ال(typique ) ،،، غالبا التونسي عندو شخصيّة مركّبة ، فسيفساء في المشاعر، التفكير و السّلوكات. أوّلا التّونسي ينجّم فيسع ينسى ، شعب نسّايْ و هاكا علاش التونسي ساهل باش يتنقّل من حال إلى حال من غير مراحل وبلا صعوبة ......كيف ما مثلا ، يتنقّل من الحزن للفرْح و إلاّ العكس.... بسهولة و بلاش تأثيرات جانبيّة ،،، التّونسي زاده متقلّب الأحوال – و باقتناع مزمن – مثلا كيف يحضر في حزن يعطيه كارو وْ ما لازمو ، و كي تجي المهرجانات و الأعراس و الرّبوخات يقولّك أنا ليها و يولّي طيّارة متاع جوّ و شطيح ورديح ... تجيه في الكورة تلقاه أكبر عرّيف و محلّل رياضي وطني و إلا حتّى عالمي و أكبر المحلّلين ما يحكيش معاه ... نفس التونسي دوّرلو ع السّياسة يولّي محلّل سياسي ما يتقطّعش ، و يقولّك ع البسباس و من زرعو ....، لا وْ واثق من كلامو ويزيد يعطيك نظرة استشرافيّة للأحداث السّياسيّة كان حبّيت ... هو نفسو التونسي ...تحكي معاه ع الدّين يولّي التقوى تشعّ من عينيه ، و يظهّرْلك اللّي هو خبير في الشريعة و القرآن و السنّة و ما يوقّفوا كان النّص ....على خاطر ما يحفظوش ،وقتها يجيبلك طرف الآية و الاّ يقولك فيما معناه و يتعدّى ،أما في الفتاوي فهُو ..ساهل ياسر باش ينقلب إلى موسوعة ...، يحلّل ويحرّم ويفتي.... كي تسمعو حتّى الإمام مالك ما يقولش بيه ... نجيوا توّا إلى عالم المال و الأعمال و الأفاريات ،،،في ها الباب التونسي يتميّز بحاجتين : الأوّلى ،،، خلّينا نقولو عندو انفصام في الشّخصيّة الإقتصاديّة و الثّانية هو بنفسو يتسمّى – المعجزة الإقتصاديّة – أمّا الأوّلى عندو انفصام على خاطر ظاهرا ...في القهاوي و الشّارع و خصوصا في الإعلام تسمع كان التجويح ، ما ثماش فلوس و الأسعار نار و الشهرية شويّا ،، لكن مع أوّل مناسبة تلقا أكثر النّاس شادّة الصفوف و عاملة الحضُبْ ...على العلوش أو ع الزقوقو و الدّجاج ...و إلا حتّى ع المنكرات ،،،و يزيد غرامو و يهبط العسل كيف يسمع بحاجة مفقودة ،،، أمّا أنّو معجزة إقتصاديّة فالتونسي بشهريّة 500 د مثلا يصرف بيها ما قيمتو مليون و خمسمائة ،،و يخلف على القروض بأنواعها و أشكالها .. إيه نعم التونسي معجزة إقتصاديّة ..، تحبّوا تعرفوا علاش ، أيا سيدي إسمعوا: العام فيه قدّاش من مناسبة : العيد الأول و الثاني ، دخول المدرسة ، الريفيّون وبعّد المولد ، الأعراس والمهرجانات و النّجاحات و زيد معاهم الصّيف و الخلاعة ،،، طبعا مع المصروف اليومي + فاتورات الماء و الضو و التاليفون و الفينيات و غيرو ،،،، هاذم الكلّ التونسي يعانيهم و يكمبص ليهم و في الآخر يعدّيهم و يسلّكها ثمّ يفسّخ و يعاود من جديد ،،، بذمّتكم ثمّاشي شعب آخر ينجّم ها المعادلة الشّائكة و الmission impossible...؟ نزيدكم من الشِّعر بيت ، التونسي و البَنْي -البناء -. خصوصا في الأحياء الشّعبيّة ،،، تلقاه ياخو دار من الكنال و تعرفوا نار الكنال ، طبعا ياخذها بالقروض ،، ما يعدّي 4 و إلاّ 5 سنين إلاّ و يبدا في تكركير السّيمان و الياجور و تبدا الحيوط طالعة ، يسكّرها من الجيهات الكلّ حتّى يقطع الضوّ و الهواء ،، يبني الطابق الأوّل ، يزيد يكحّلها و يركّب شويا بيبان و يطلع يسكن فيها و يكتب على الأولى (( للكراء ) )،، باش يخلّص كريدياتو.... و يكمّل باقي حياتو غالبا هكّا بين الأحمر و الأكحل.. و كي يجي الصّيف و تسخن فيه الدّنيا يهبط يتعشّى و يتبرّد هو و المدامة تحت بوطو الضوّ متا ع البلديّة ،،، يعني يسكّرها يقعد تحتها ،،،... حاصيلو التونسي أعجوبة زمانو و يؤمن يا سر بالمثل اللّي يقول(( كيما يجيك الوقت إيجاه ))---- و الحقيقة الظروف هي اللّي خلاّتو يكمبص و يقلب و يخترع ، موش يقولوا الحاجة أمّ الإختراع ؟؟ كلامولوجيا * * * Partager Tweet 4 de 4 commentaires pour l'article 106807 Matouchi (Tunisia) |Mercredi 10 Juin 2015 à 18h 09m | بصراحة الشيء الي ما فهمتوش في التونسي....كيفاش يخلي بنت بلادو تطلع مع ليبي في كرهبة والا في برتمان و الا حتى في البحر؟ يراها...وكان قال حاجة يقولها للي بجنبو.... و قالك الليبي الشاب يحشم كيف يقول لبوه ماشي لتونس... أفضل يقول ماشي لمالاوي...للزمبابوي....لتايلاندا...لبركينا فاسو لهذه الدرجة أصبح التونسي متخنزر؟؟ توة النهضة ما عندهاش برنامج لها الحكاية؟؟ مثلا تخرج فتوى في جواز زواج المتعة... و هي مخنزرة مخنزرة....نقولوا ... فبحيث تنهض بالتخنزير Alerter Pontlibre (Tunisia) |Mercredi 10 Juin 2015 à 15h 21m | التونسي يعرس بالشيكات وين يطيح الليل يبيت. Alerter Mongi (Tunisia) |Mercredi 10 Juin 2015 à 14h 59m | ونزيدك زيادة يا سي منجي : التونسي يمشي بوجهين(إلاّ ما رحم ربّي) وجه مع الثورة ووجه مع الثورة المضادّة. ويربط الخيوط مع النّاس الكل واللّي يطلع هو معاه وديما يمشي. وهاني معاكم لا تشكّوا فيّ. قلوبهم مع الحسين وسيوفهم مع يزيد. أقوالهم لصالح الثورة وأفعالهم(اعتصامات وفوضى) ضد الثورة. Alerter Njimabd (Tunisia) |Mercredi 10 Juin 2015 à 14h 36m | بعد الثورة انكشف التونسي على حقيقته و كل يوم نكتشف في أنفسنا أشياء كنا نجهلها (مع بعض الإستثناءات طبعا حتى لا نعمم)
