رئيس البلدية يقود إنقلاب حقيقي (ماهيش جديدة عليه الإنقلابات) على المجلس البلدي و الديمقراطية التشاركية و التسيير الجماعي للشأن المحلي ، إنقلاب مش ناعم كي عملو بن علي ..لكن بنفس الوجوه و الأيادي .. مجلس بلدي فيه 30 مستشار يتحول إلى ديكور بفضل مجهودات رئيس المجلس الذي أطلق العنان لنفسه باش يظهر نزعاتو الفاشية إلي متنجحش ضحكاتو الخارجة على السياق و الموضوع و إلي في غير محلها ،في تخبية حقيقتو .. وجهو الحقيقي إلي شفناه في أول جلسة وقت إلي تعالى صوت التكبير في قاعة البلدية و في الدروج في مشهد يشبه للي شفناه في غزوة السفارة و المنقالة إلخ.. رئيس البلدية نفسو يتحول إلى دكتاتور صغير و رهينة في نفس الوقت ..رهينة عند موظف بالبلدية يمثل النظام و إستمرارية الخيارات السيئة منذ عقود و عقلية التلون و الحرباء .. بالحق خطير جدا وقت رئيس بلدية يتدخل في أعمال اللجان ليس فقط بمنطق الوصاية و فرض الرأي بل بالتآمر و التحريض على بقية المستشارين ..يلغي موعد إنعقاد لجنة متابعة مشاريع الوكالة العقارية دون حتى إعلام رئيستها و يراسل أعضاء اللجنة ليعلمهم بأنها الغيت ، يرفض رفضا قاطعا تخصيص مكتب للمستشارين بالبلدية ..و يكمل يأمر رئيسة الدائرة متع الأنس بطرد أعضاء الدائرة و عدم تمكينهم من الإجتماع الأدهى و الأمر هو إصرارو مش فقط على حجب المعلومة على المواطن بل حتى على المستشارين ..وقت إلي الإدارة تتعمد عدم مراسلتي و إعلامي بموعد إنعقاد الجلسات بشكل إنتقائي و تصدر توصية في هذا بشكل أشبه بممارسات البوليس السياسي ..و قت السيد هذا و إلي معاه يحاولو يعرقلوا عمل رفيقي و يعملوا المستحيل باش يحاولوا يحدوا من تواصلوا مع العمال .. وقت إلي يقوم رئيس البلدية و يقول إنو البلدية ماتتدخلش في مشاكل الرخص ..وقت إلي السيد رئيس البلدية يتحدث على تقارير بالنشاط ..وقت إلي يدور و يبربش في جرتي و بعد يجي يقلي سيب عليك من الدوسي الفلاني و الفلتاني راهو حديث فارغ و البلدية ماعندها متعمل .. الأكثر من هذا الكل و الأخطر هو سياسة الغمة في علاقة بالميزانية ..حاجة تشبه برشة لبرلمان بن علي بصورة أكثر رداءة زادة ..عاملين ورقة قال شنو ميزانية و يحبونا نصادقوا عليها ..لا يا سيدي احنا لم نشارك في إعداد هذا و اخدموا وحدك سيد رئيس البلدية ..شكون قلك إلي احنا موافقين على المبلغ المرصود للسيارات الإدارية مثلا .. إلي صار اليوم مهزلة و خطر كبير يتهدد الساقية الكل ..سيد رئيس البلدية امشي أعمل حملتك الإنتخابية بعيد ..أنا وحدة من الناس فاهمتك علاش تمشي و تجي و عارفة إنو الجماعة نزلوا عليك باش متخلي حتى لون آخر يظهر بخلاف النهضة و إذا إقتضى الأمر تعطل كل شيء باش تتقاسم الفشل مع الآخرين ..نحب نقلك حاجتين صحيح إنت دخلتها بعضها مع الناس الكل لكن باش نحكي في نقطة تعنيني أنا ، لوننا أحمر سيد رئيس البلدية متنجمش تغطيه بلونك الحباري الماسط .. ثانيا نصيحة ليك ، إلي قاعد يدبر عليك باش يصنع منك حمادي جبالي رقم ثنين و في النهاية نشوف إنو أمام ما يحصل لازم البحث حول أرضية مشتركة متع الأدنى على الأقل للتصدي لهذا الخور الكبير كي إلي صار اليوم وقت رفضنا الميزانية و خرجنا أكثر من شطر المجلس و بالطبيعة مواصلة العمل مع الناس و تنويرهم بالمعلومة. رحمة عبد المولى عضوة بالمجلس البلدي
