بعد الضجّة التي أثارها رئيس حركة النهضة راشد الغنوشي بتواجده بسهرة فنّية، بحضور عدد من الفنانين التونسيين، نشر نقيب الفنانين مقداد السهيلي اليوم الخميس 3 أكتوبر 2019، تدوينة على حسابه الرسمي وضّح فيها حقيقة الدعوة التي تلقّوها. وقال السهيلي: "باختصار: برشة فنانين عملولي تليفونات يحبوا توضيح فيما يخص الفيديو والتصاور اللي خرجوا متاع اللقاء اللي نظمتو حركة النهضة مع بعض الفنانين ... وكثرت التعليقات ... وكل حد يفسر بطريقتو ... نحب نوضح للجميع باختصار شديد: أنا مسؤول على نقابة الموسيقيين .. معناها الموسيقيين متاع تونس إنتخبوني في مؤتمر وقع في مركب المنزه السادس باش نتولى أمرهم ... وندافعلهم على حقوقهم ... ونقوم بواجبي كما ينبغي ... لذا ... من جملة ماقمنا بيه في النقابة ... أجرينا عدة إتصالات بالعديد من الأحزاب السياسية لتأسيس برنامج ثقافي يهدف إلى تأطير الساحة الثقافية والفنية في بلادنا التأطير اللي يليق بيها ويساهم في تحسين الظروف الاجتماعية والقانونية للفنان ... ومشينا لحركة نداء تونس ... ومشينا في 2014 لحركة النهضة فماش مانلقاو تجاوب ... لكن مع الاسف الشديد مافمة كان الوعود الزائفة والكلام المعسول اللي عنا منو قناطر في ديارنا ... لذا ولينا في كل مرة ناخذوا حذرنا من أي دعوة تجينا من أي جهة كانت ... المرة هاذي كلمونا مرة أخرى حركة النهضة على أساس باش يكون لقاء جدي يسمعونا فيه ويمضيوا معانا تعهد واضح لحل بعض المسائل العالقة واللي ولات تضحك في بلاد تحب تولي ديمقراطية وتهز في اكتافها عالبلدان العربية ... ياخي كي تبعنا الحكاية للخر فهمنا اللي هي باش تكون قعدة مجاملة - بمناسبة الانتخابات التشريعية - وهاكم شفتوا اللي صار ... ماكلة ... وقعدةحلوة ... وغناء ... وهات يافنان أسمعنا رنة العيدان ... هذاكة علاش مامشيناش...وأنا راني بكل وضوح ... متربي عالرجلة ... والصراحة .. وكلمتي نقولها قدام اي كان مهما كان منصبو ونفوذو ... ومانخاف كان من رب العزة ... وعلى كل تبقى ديمة الساحة الفنية مفرتة ... وكل واحد يعمل على زي راسو ... وكل حد يقلك من راسي تقرع ... على عكس بلدان العالم أجمع ... واللي شاهي شهوة يحطها في عشاه وقبل مانختم نحب نوضح حاجة مهمة للناس الكل باش ماعادش يعاودونا نفس الغلطة راو اللي يحكي عالفنان يلزمو مايدخلش في السياسة راو يضحك وسامحوني جاهل وماهو فاهم شيء ... على خاطر في العالم أجمع الفنانين عندهم مواقف سياسية وفكرية من مجتمعاتهم وفمة اللي منخرطين في أحزاب ... امالا كيفاش تتحل مشاكل الوسط الفني من غير حوار مع السياسيين !!! موش كيفنا أحنا الفنان يلزمو بعيد عالسياسة باش يحبوه الاحزاب الكل ... ويحب الفريق القومي باش يحبوه الفرق الكل ويبدا يترهدن ويتمسكن مع الناس باش يقولوا متربي ... والسلام."
