نشرت الصحفية خولة السليتي تدوينة مطولة على صفحتها على شبكة التواصل الاجتماعي ذكرت فيها ما تعرضت له اليوم خلال تغطيتها لمشروع إحداث المركز الثقافي والرياضي للشباب ببن عروس، وتحديدا حوارها مع والي الجهة عز الدين شلبي. وكتبت الصحفية "هاو علاش قلت عليه "والي برتبة باندي"..والمقصود هو والي بن عروس .. اليوم كنت في مهمة تغطية صحفية لمعاينة كل من وزير الشباب والرياضة وسفير الصين في تونس لمشروع إحداث المركز الثقافي والرياضي للشباب بن عروس وفي إطار المهنية خذيت مع عدد من الزملاء تصريحات من طرف كل من سفير الصين ووزير الشباب بخصوص المشروع ونفس الشيء صار مع والي الجهة الي بمجرد سؤالو عن المشروع تحدث وتحدث وتحدث... وتابعت "ومر مباشرة(وحدو وحدو) للاستشارة الوطنية ومن هنا قتلو "سيد الوالي طالما تحدثت على الاستشارة فرصة نسألوك على مدى الاقبال على دور الشباب في علاقة بالاستشارة وردكم على جملة الانتقادات الاخيرة الي وجهتلكم على خلفية الفيديو الي ظهرتو فيه على مواقع التواصل الاجتماعي في علاقة بالاستشارة" .. وكنت نعقل شفت شخص اخر متشنج مضطرب سعيت قدر الإمكان للخفاظ على برودة اعصابي وحاولت اني نهدي الجو" وكان ذلك".. ثم تشنج والي بن عروس فجأة في علاقة بالانتقادات وقلي فسرلي قتلو "جانب منها كان متعلق بعدم احترام المعطيات الشخصية للمشاركين من قبيل تقلهم صوروهملي وجيبوهملي.. وفي علاقة ايضا بالقوات الحاملة للسلاح" .. وكنت نعقل مرة أخرى، السيد الوالي يدخل في حالة تشنج قد ما خدمت لا عمري ريت مسؤول كيفو واصبح يتهمني بتقسيم التونسيين وانو الي قسم التوانسة ليس بتونسي.. تمالكت اعصابي وقتلو "معناها انا موش تونسية حسب كلامك".. بكل وقاحة جاوبني وقالي "ايه طالما تقسم في التوانسة".. ومر مباشرة يقلي "انت تمس مالقوات الحاملة للسلاح الي هوما مواطنين درجة اولى (نكبة الدهر نسؤول يتحدث عن مواطنين درجة اولى ودرجة ثانية) وبمقتضى الدستور عندهم الحق يشاركوا".. نزيد نحافظ على برودة الدم ونتفاعل ونقلو "السيد الوالي الدستور لم يتحدث البتة على الي حكيتلو والحاجة الوحيدة ربما في علاقة بحق الامنيين المشاركة في الانتخابات البلدية".. يزيد تقوى دوزة التشنج متاعو ويقلي "برة افهم مليح وانتوما الصحافيين زعام كان تسألو وانتوما واعلامكم تقسمو في الشعب التونسي... وانت سؤالك فيه فخ... وتحكي على حملة انتخابية (وانا لا جات على لساني) و... و...... ووقت خيرت اني نقص الحوار أصر يواصل ويفاجئني بكل وقاحة وحقارة مرة أخرى ويبادر برمي الاتهامات ويقلي "انت مكلفة بمهمة وباعثك فريق سياسي"... ويواصل الكذب على وزير الشباب ويقلو "قتلي القوات الحاملة للسلاح ما يشاركوش في الاستشارة"(بينما انا دخلتش في هذا اصلا نقلتلو نقد وجه له).. ويختمها بجملة صحة له صحة له سمعتهاش مباشرة لانو فوجئت بها في فيديو وقت قال "جاية مكلفة بمهمة ماخذة بعض الدنانير من سياسيين ومن راديو باعثينها باش تقسملي الشعب التونسي"... وختمت بالقول "إلى والي بن عروس وأخاطب الصفة هنا ولن أخاطبك مستقبلا بصفة "سيادتكم وسيد الوالي" لأنك لست أهلا للاحترام ومن لا يَحترم لا يُحترم.. الصباح قتلي "أنا الدولة من واجبك تحترمني جاوبتك وأنا مواطنة من واجب الدولة والمسؤول يحترمني ويحترم العمل الصحفي".. لكن موش عاجبك وقتلي "موش من حقك تسألني الأسئلة هذي" يعني تمارس عنف لفظي ومعنوي وتزيدو رقابة مسبقة على أساس نخدم عندك في مكتب الولاية".. وتزيد تقوم بالثلب والشتم وتشويه سمعة.. والي بن عروس انت جيت البارح للمسؤولية وانا من 11سنة نمارس في العمل الصحفي ولا قللت يوم من احترام مسؤول، نعلمك يا والي بن عروسانو بيننا القضاء وتشويهك ما يرجعنيش لتالي وما يخوفنيش أما هات أثبت قدام القضاء اتهاماتك بأني مدفوعة الأجر ومكلفة بمهمة من فريق سياسي .. وقد أرفقت الصحفية تدوينتها المطولة بمقطع فيديو لبعض ما حدث مع الوالي اليوم.
