أيا عيدكم مبروك وكل عام وإنتوما حيين بخير.. وكل عام وإنتوما ذابحيين ..وشايخين باللحم.. والمرقاز.. والمقلي والمشوي.. والقديد.. والعصبان.. وكل عام وإنتوما تقليوا وتشويوا وتقددوا وتعصبنوا.. وتسلخوا.. كل عام وإنتوما ساقيكم مقطعين من رحبة لرحبة ومن تاجر لتاجر ومن فلاح لفلاح.. ومن قشار لقشار.. تبيع وتشري.. ويشريووك ويبيعوك.. وتوزن وتقيس وتغيس.. وتسوم وفي عرق الغلبة تعوم.. كل عام وإنت تسأل على الأسوام.. والسعي غلاشي بين العام والعام.. كل عام وإنت تقلّب ويقلبوك ويشقلبوك..ويزلبحوك ويغشوك.. وأولاد يبلعوك.. ويمرجوك.. حتى توصل تلعن في النهار اللي جابك فيه بوك.. كل عام وإنت تبدا تفركس على علوشك وتحسب في فلوسك.. حتى تتقلع ضروسك.. وإنت تعفس في الطباعي والقلت.. وبالات القرط والحشيش .كل عام وإنت من رحبة لرحبة ومن غلبة لغلبة.. كل عام وإنت تجدّد في جهاز العلوش.. هاو بارباكيوللي عندو وكانون للي ما عاندوش.. والفحم والبخور.. والسفافد.. وتمضية السكاكن.. وتفركيسك على ذباح ما يضربك في الراس والساقين والجلد وشطر فخذ ونص الكبدة والقلب وخصوصا يكون طاهر وما يحرّملكش الذبيحة.. كل عام وإنتوما حيين بخير.. تشربوا في القازوز والعصير.. وتعملوا القعدات والنصبات وتركزوا الطاولات بين المشويات والقلايات والكستيليات وتعبيوا كريشاتكم باللحمات.. وتشيخوا الوليدات.. ومن غدوة تتفكروا الكريديات ..والقروضات وكيفاش وفات الشهريات قبل ما جات.. كل عام وإنتوما بخير حيين.. آمين ..كل عام وأعيادكم تمخميخ في تمخميخ.. من الصغير ..للكبير.. وكل عام والقشارة يعيدوا في مكاتبهم والذباحة والقصّابة يدوروا دولابهم وكل عام وإنتوما ذابحين من نهار الوقفة الى يوم الدين. للتعليق على هذا الموضوع: