أرسم ولدي ناقة وجمل *** وخوت وهل *** ونجع مربع بين دخل *** أرسم ولدي أرسم رياس *** أرسم قادة وفلوس أكداس وتتباهى قدام الناس ***وهي لا تربط لا تحل أرسم ولدي خوذ أرسم قمة *** خوذ أرسم قمة في دولة عربية مهتمة ووجوه العالم ملثمة *** ما تخدمش قضاية الأمة *** ولا للمائل بتعدّل والواحد مننا له همة *** يراجي ويترقب في الحل والقادة حرقولة دمه *** بنركع لأمريكا ننذلْ أرسم ولدي أرسم رابين *** أرسم رابين أرسم مدنس فلسطين أرسمْ وأرسمْ أعداء الدين *** أمريكي وبريطاني وصل لشرم الشيخ ومجتمعين *** وعباس بباراك قبل أنا بنسلَم فلسطين *** أشنع موقف لينا مثل أرسم ولدي أبدأ وأرسم غزة *** أبدا وأرسم غزة وأركان العالم مهتزة تحاصر في بقعة ملتزة *** بين يهود وبين بضلْ والأنفاق اللي في وقت الحزة ترسم وتحدد في الحل وأبطال أسلامي معتزة *** و تخلص في كل وحل أرسم ولدي أرسم شيشان *** أرسم شيشان أرسم وأرسم في كل مكان حزام ناسف ما فيه هوان *** الروسي منعوه من الظل وخلوه يفكر حيران *** ومنعوه الشارع ينزل أرسم ولدي السودان اليوم *** السودان اليوم حائر تعبان ومهموم الغربان تحوم *** على ترابه كان تدلّل خائن موهوم *** يبي أمريكا أرضة تدخل دارفور اليوم *** الحجة والزور الباطل أرسم ولدي أرسم صدام *** أرسم صدام شهيد الأمة لا ما يلتام واجه الإعدام *** وشهَد لا تلعثم لا زلْ قلبه ضرغام *** عظيم ثابت ما يوم رقلْ صابر صوّام *** ولا على دربة يتحول أرسم ولدي نجي أفغانستان *** نجي أفغانستان نجي وننزل في كل مكان رجال وشجعان *** اللي تسكن في كل جبل تقتّل فئران *** النيتو و أوباما تسحل وتفتح بركان *** ومن تحت أقدامه تزلزل أرسم ولدي يمنى مظلوم *** يمني مظلوم مجزئ متقطع مقسوم بين سلطة شؤم *** وحراك جنوبي جاهل مواطن محروم *** أمّا مخزن وأمّا عاطل والإرهاب يحوم *** والحوتي فينا يقتّل أرسم ولدي هذي أمة الإسلام *** هذي أمة الإسلام يا ولدي كانك فهّام نمشي نبني خيام *** ونرجع لوقتي الأول خالد ضرغام *** وصديق وفاروق عدل وعلي همام *** وحمزة ما يرضى الباطل أرسم ولدي أرسم حطين *** أرسم حطين أرسم فيها رجال فراسين حلفت بيمين *** أيمين المؤمن ما ينزل قالوا جايين *** حصان صلاح الدين صهل ووفى بالدين *** على أيديه الحال تبدل أرسم ولدي وين عز زمان ؟!*** وين عز زمان أبطال العربان الشجعان ؟!؟ عزة الأوطان *** لو كان البارود شعل يجوا فوق سمان *** مكاليف صحاح تزلزل قلوب الخيان *** اللي ترعش ديمة ترقل وباعة الأوطان *** من الخوف ومن حب الذل وقبضت الأثمان *** صفعة وأيديه تقبل أرسم ولدي الأوطان تنادي *** الأوطان تنادي وين أولادي ؟ وين أحفادي ؟ وين صلاح الدين الهادي ؟؟ *** اللي شمل الأمة جمّل ! ووين المختار وأبو هادي ؟؟ *** وين أبو مدين وين نزل ؟؟ ووين ناصر قامع الأعادي ؟؟؟ *** ميزان القوة يعدّلْ !! ووين فيصل وتريس أبادي ؟؟؟ *** الناقة والنخلة هي الحل !!! أرسم ولدي أرسم ولدي ناقة وجمل *** وخوت وهل *** ونجع مربع بين دخل أرسم ولدي -------------------------------------------------------- من عبق الاصالة والحرف المحكي من هناك من ارض عمر المختار أتت شاعرتنا يمامة النطيط لتحاكي لنا الواقع بحرف رخيم اهلا بشاعرتنا في اروقة مجلتنا اوتار .................... عيسى ابو الراغب