نحّي شُعبه، حُطْ شعبه كعبه، كعبه، وفاتْ اللّعبه والمنجلْ في الڤلّهْ حْصُلْ يا تْكسرها، يا تخلّيها مرْكوزه كي زيرْ الخلْ يعني إمًّا تبوس اللّفعى ولاّ تطيحْ في بيرْ القصعهْ وتموتْ بالغبْنهْ والفجْعهْ ويڤولولكْ: يا بطلْ! يا تايهْ في خلا برموده في فلوكهْ أيّامْها معدوده في شْتا ولْيالي سودهْ والقايدْ لا يْبلْ، لايعلْ في مثلّثْ ڤالُوا خطيرْ امّاليه تخطّطْ وتديرْ قبل الجامعْ جابُو حصيرْ وكلْ واحدْ يربط ويحلْ يتْقاسموا في الترْكه ملاّ شوههْ، ملاّ عرْكهْ جماعهْ ما بيناتهم شركه خوذْ ناقهْ، هاتْ جملْ ونصبُو رْواحْهمْ يا مغْبُونْ هذا وزيرْ وهذا عوْن وهذا موصّي عليه فرْعون وهذا في وسْطْهم فْحل وهذا جابو حلف النيتُو فهذا يقفلْ في سوريتو قامْ يلقى روحو في بيتُو في قصرْ وعسكر وطبل وهذا قالورا من الاخيارْ مالْڤاشي بحْذاهْ أنصارْ هاوْ يْحاولْ يبني الدّارْ يرْبط في العرْصهْ بالتّلْ والتعطيل وْرَا التعطيلْ لا مُحاسْبهْ، لا تشْغيلْ والمستقبلْ كيفْ اللّيل يا ربّي تخلّص لوحلْ. مثلث برمودا: مكان خطير في المحيط الأطلسي تختفي فيه السفن فجأة.