مالثلاثي للسداسي و التعليم ديما يقاسي لا واحد يعطينا الحق و لا وحدة اتطبطب و تواسي الكلّ يقلّك يزّي فكّ اضرب لكن أخطى راسي قلبي اتعبّى و فاض الكاس و هالإصلاح فيّض كاسي ما نقرّي كان بضميري و ما نقرّي كان باحساسي أما لّي بعثر لحساس و خلّى اللحظة موش قياسي هالنّاس الي تشدّ الباس و ظاهر لعبتها الكراسي خلّاو التعليم سفينة يحبّ يغرّقها السّياسي علاش تنحّي في الثلاثي و تفرض علينا السّدااسي؟؟ و تنحي الأسبوع المغلق تضيّق عليّ أنفاسي في حبار ستيلويا نغرق لا نعرف راسي من ساسي نجري في درسي ما نلحق و التلميذ معايا يقاسي يقلي "تعبنا يا مدام دفواري هو هلواسي" نقلو "اصبر شي مادام توة يوفى هالسداسي و نمشي نلقى زملائي أعظم مني في احساسي كرامتنا موش كلام راهي قبل شربي و لباسي و اذا طلبنا زيادة مال هاك حقي موش افلاسي أحنا نربي في أجيااال لا جينا نطلب لا نساسي قلت نصلّح التعليم و نعمل الي يقلي راسي الإصلاح موش عناااد تفكّر اذا انت ناسي وفات أيام الديكتاتووور يزّيها تونس ما تقاسي انت بلي عملتو هذا في قصر التعليم الماسي زيّنت شوية البراني و صلّحت شبابك و كراسي و خليت الوسطاني خاايخ سقفو طايح على راسي بدّلتو مطعم لقراية فرعستو العام الدّراسي امال كعنيش العيادي…استاذة بمعهد ابي القاسم الشابي صفاقس