بدات بعض الصفحات الامنيّة في التفاعل مع إستشهاد أربعة اعوان البارحة في مدينة القصرين ومن خلالها أحسسنا بالالم الذي تعيشه المؤسّسة الامنيّة وهذا بعض ما كتبته صفحة إدارة الشرطة العدليّة : الشّعب عمل مظاهرة على ولد الكانز .. على شكري بلعيد .. على سامي الفهري .. تجمّعتم من أجل أمينة فيمن .. إلتففتم حول كافون .. خرجتم من أجل البراهمي .. خرجتم من أجل شركة يسر لتبييض الأموال .. خرجتم من أجل أحزابكم وزعمائكم .. خرجتم من أجل السياسيّين .. شكون آخر خرجتوا على خاطرو ؟ فكّروني ؟؟ ها نسيت عزيز عمامي .. شكون آخر بربّي ؟؟ مازال كي يتوفّى قرد في البلفيدار تخرجوا وتعتصموا وتنادوا بالدّيمقراطيّة وفري زطّال .. فري سارق .. فري ولد الشّعب .. باهي توّا سامي الفهري يمتّعكم في رمضان بالمسلسلات .. والبقيّة زطّالة تحبّوا من خلالهم أنهّم ينحّوا قانون الزّطلة .. والسياسيّين عاد ماهو يمشولكم في حويجة باش تخرجوا وتعيّطوا وتروّحوا .. أمّا انت يا ابن الخضراء تستشهد باش يجي واحد يزايد عليك يقلّك توفّيت ؟ ربي معاك وهاذيكا خدمتك .. صحيح .. نستاهلوا أكثر من هكّا منكم .. نستاهلوا كلمتين باردين في الأخبار تقول اللي استشهد جندي في الموزمبيق مش في تونس .. خرجتوا على خاطر السارق والزطّال والسياسي وووو .. أمّا باش تخرجوا على خاطر تونس ولاّ أولاد تونس اللي قاعدة تستشهد على خاطركم وعلى خاطر بلادكم ؟؟ لا ما تخرجوش على خاطرهم شكونهم هوما باش تخرجوا على خاطرهم تي ماهي خدمتهم ويخلصوا عليها .. نعرف مش باش يحسّ بالكلام هذا كان الزّميل والاّ اللي عندو في عايلتو ولا بين صحابو زميل .. تحيّة كبيرة لكلّ رجال تونس .. ولا عاش في تونس من خانها ولا عاش من ليس من جندها .. نموت نموت ويحيا الوطن ..
