ما عادش شيء بلاش.. كل شيء بالفلوس.. ما ناقص كان الهواء اللّي نتنفسوه يولي بالفلوس.. وتولي الشهقة بخمس ميا والزفرة بدنوس.. حتى بحر ربي ولّى بالفلوس ..تعوم بالفلوس.. وتغطس بالفلوس. وتقعد على الرمل بالفلوس وتتبقل بالفلوس.. الفلوس اللي تحيي النفوس.. بلاش بيها تعيش متعوس.. ومن غيرها تقعد منحوس.. وحياتك تعديها سلاطة فقوس.. الفلوس اللّي الناس حبوها.. وعبدوها.. وعبّروها..وخبوها وخزنوها.. وتفتفوها.. وسرقوها .ونهبوها عليها طاحت الارواح.. والولد قتل بوه.. والخو ذبح خوه.. الفلوس اللّي قامت على خاطرها الحروبات ..الحنينات اللّي على خاطرها اللي مات مات.. وعلى ريحتها بلدان وشعوب مشات.. الحنينات اللّي تحل ثنية في البحورات.. تبني العمارات وتعّلي القصورات ..وتشري الفيلات.. وضماير الرجال وبدنات البنات.. قدامها الروس تركع والعينين تخشع.. واللّي قد ما تعبي منها عمرك ما تشبع.. وماذا بيك منها ديما تبلع.. وقت الغصرة تنفع.. بصوتها الاطرش يسمع.. والاعمى يشوف واللّي يتكلم يبلع.. ويبلّع.. الفلوس اللّي بيها يحبوك ويقدروك.. ويبجلوك ..وفوق روسهم يحطوك.. ويحترموك.. وعلى كفوف الراحة يهزوك.. هي أصلك وفصلك.. وبوك ..وجدك.. وعمك وخالك وخوك من غيرها يحتقروك.. ويهينوك.. ولا قدر يعطيووك .. الفلوس اللّي بيها تعيش وتربي الريش.. وبيها ترفع الراس.. وتولّي خيار الناس.. المريض تردو لاباس.. الفلوس اللّي على خاطرها الناس تموت.. وتفوت وتقلب وتتشقلب.. وبيها ناس تلعب.. والضعيف يغلب والعطشان يشرب.. الجيعان يشبع.. والمديون يدفع والخسيس قدرو يرفع.. الفلوس.. الفلوس.. آه من الفلوس. فيصل الصمعي للتعليق على هذا الموضوع: