الله يرحم والديهم اللي غلاو في الدخان.. ندعيلهم كل يوم بالرحمة.. وندعي كل يوم وليلة باش يزيدو يغليو فيه.. وكان لزم كل يوم.. الدخان قتلنا.. ونشريو في الموت بفلوسنا.. وندفعوا عليه نهد كبدنا.. الطبّة عايشين منو.. والسبيطارات عايشين منو..والكلينيكات عايشين منو.. كان أحنا قاعدين نموتوا بيه.. ويا ريت أحنا بركة.. أحنا وعائلاتنا.. وأولادنا.. الواحد ما يوصل للاربعين الا ما يعملولوا الاربعين متاعو..يبدا يكح وينبر وصدرو كي بندير المزاودية.. يصفر كالمزود والا الزكرة.. والساقين ترعش كي عصي الطبل.. والنفس يخشخش تقول عليها تلفزة من غير أنوتان.. في الليل تكندر وتنين وفي النهار كحة وبلغم.. الله يهلك اللي بدعو.. من السيقارو للسيقار.. للشيشة.. عملولو قوانين ما فاد.. حرّموه في بلايص ما فاد.. عملولوا خطايا ما فاد.. الطبة نصحوا ما فاد.. عملوا يوم عالمي ما فاد.. برامج في التلفزة ما فاد.. إحصائيات ما فاد.. والناس كل يوم زايدة على قدام.. رجال ونساء وأولاد ونبات.. في الديار في القهاوي في الشوارع قدام المكاتب في الليسيات.. في الجامعات في محطات الكيران والميتروات.. في الادارات..في السبيطارات.. لا يهمهم في المريض.. لا يهمهم في اللي مات ..ما تشوف كان الباكوات تتّجبد ورا الباكوات.. والجبدات وراء الجبدات ..في العروسات.. في القعدات والنصبات ..والسهريات.. والصالات.. والاوتيلات ..يتكيفوا بالميآت..ويموتو كل يوم بالألوفات ..في مختلف أنحاء العالم.. الله يهلك من كان أسطة وسبب ..وبلانا بها الغلب.. اللي ما لقينا من هروبو سبب ..واللي تكيفو..حياتو تعب في تعب.. من قصان النفس.. لخفقان القلب... أنا ما نحسد حد في هالدنيا.. لا اللي عندو فلوس ..ولا اللي عندو ديار.. وبلاصات.. ولا اللي يلعب بالكعب.. ما نحسد كان اللي يقلي ما نتكيفش..والدخان معايا ما يلعبش.. رابح صحتو.. ورابح فلوسو.. تلقاه في السبعين وهو ما زال يطنطن.. وفي بدنو يدندن موش كيفي.. عمري خمسين واللي يخزرلي يعطيني ماية وقفة لا صدر.. لا نفسي.. لا سوفل.. لا ركايب.. في عز شبابي شايب.. وجهي مجلد..خايب..على هذاكة نقول الله يهلك اللي بدع الدخان.. والله يرحم والدين اللي غلى فيه.. وزاد فيه.. وإنشاء الله ديما يزيدو فيه.. ويقطعوه.. حتى ينحوه.. فيصل الصمعي للتعليق على هذا الموضوع:
