أحنا هكة... اللي يحب واللي يكره يكره... أحنا هكة... نموتوا على التكركير... والتفتين... نخدموا على قد فلوسنا... ونصرفوا أكثر من شهريتنا ومصوارنا نموتو على القروضات والتسليفات... حتى ولات عادة تجري في دمنا... نموتوا على بوحلّوق والهندي المقشر... نحبوا الفصعات والغيابات ونعشقوا السرتيفيكا ميدكال... نموتوا على الدخول موخّر والخروج بكري... ونبداو نستناوّ في الزيادات بالدقيقة والدرج... نموتوا على البوبلاش خصوصا كيف يبدا رزق الحاكم... رزق البيليك... نحبوا العراء والقراء أما نحبوا ناخذو وحدة محافظة... نحبوا بلادنا اما نموتو على «الحرقان» لبلاد الطليان... نحفظوا المطلع متاع النشيد الوطني في الستاد ونصفروا عليه كيف اللعب ما يعجبناش وإلا نبداو خاسرين... نحبوا القراية الساهلة خصوصا إذا معاها fausse copie... وإذا نجحنا أعطينا بركة نهجّوا ونشدوا الصف بالليلتين والثلاثة قدام السفارات باش ندبروا المحنونة الفيزا... لفرانسا وإلا إيطاليا وألمانيا والتشيك وروسيا وأستراليا... نرميوا الشهادات ونطيحوا نغلسوا في الصحون... وإلا نطيحوا للغبرة والباهي فينا يروّح بعجوزة قنفيدة قد ممّاتو... وكرهبة صغيرة قد بنت بنتو... أحنا هكة نحبوا الخدم المذخمة... والشهاري المنفوخة... والبلايص الهاي... نحبوا نسهروا للصباح... ونفرنيوا للصباح... والهيجة والصياح... والتفاح والنفّاح... والقوارص على الصباح... أحنا هكة نحبوا الفيس والتبزنيس والسهريات والقعدات والكراهب الكات فواكات والباسات... والبنيات الحلوات... أحنا هكة... نموتوا على الكلّوخ والمزود والربوخ وتدوير الحزام وركزان الأقدام... أحنا هكة يا سي نزار الشعري... كيف نحكيوا نجيبوها صحري وبحري... نحبوا السهريات موخّر ونكرهوا القومان بكري... نحبوا أرواحنا كي أصحاب العرش وفلوسنا تجينا للفرش... باش في الدنيا نشيخوا... أحنا هكة... نحبّوا نعيشوا بالطول والعرض ونعطيوا الفرض وننقبوا الأرض... لا يهمّنا لا في موت ولا في مرض... أحنا هكة.. وديما هكة... ديما خارجين على السكة... عايشين بالبركة لا نكبسوا السبتة لا نرخفوها... ويعيشو التوانسة ما دام أحنا هكة... وديما هكة. فيصل الصمعي للتعليق على هذا الموضوع: