ماو فمة حاجتين.. يا إما أنا مصطّك.. يا إمّا أنا أعمى.. والأغلبية أنو أنا مصطّك.. وما نفهم شيء في الاقتصاد.. كل يوم ما نقرأ كان على الازمة الاقتصادية العالمية اللي مست العالم الكل.. من أمريكا لليابان لأثيوبيا ..بانكات فلست.. شركات قيدت فاييت بالمليارات.. دول بطم طميمها قعدت على ركايبها.. ملاين الخدامة خرجت على البطالة.. بلدان الخليج تطرد في العمالة.. وشعوب في حالة.. بورصات هابطة في الحضيض.. ما تشوف كان الفلاشات الحمراء تشعل.. الكل يقلك الحركة واقفة.. والخسائر طالعة.. وفمة حتى اللي راسو تعرى.. اللي باع باع.. واللي رهن رهن.. واللي فلس فلس واللي دخل للحبس داخل للحبس.. واللي إنتحر إنتحر.. تحل الجرايد والتلافز ما تسمع كان أخبار الازمة الاقتصادية.. اللي قالو عليها أكثر من الأزمة متاع القيرّة العالمية الاولى.. مست الدنيا لكل والعالم الكل.. وتأثر بيها الكل.. كان أحنا.. والحمد لله.. كل شيء مريقل.. كل شيء مدروس.. البانكات قاعدة تربح.. ومازالت تعطي في القروضات على حساب ستة والعباد مازالت تتبلع باش تتخلع.. وتتشخلع.. وتعدي الريفيون والعيد الكبير.. وعيد الحب.. والمولد.. والشهاري مازالت تتصب في وقتها.. وتتصرف في وقتها.. وتوفى في وقتها.. وناخذوا الافونسات في وقتها.. ومازالت الديار غالية.. والناس تبني ..الاراضي غالية والناس تشري.. والكراهب موجودة والناس تشري.. والسيري ما يكملش الشهر.. والناس تشري ..والايسونس يغلى والناس تصب.. والضو يغلى والناس تشعل..والماء يغلى والناس تفرني.. والتلفونات ترخص والناس تتكلم.. والاسعار تغلى.. والناس تشري.. وتاكل وتمخمخ. القهاوي معبية.. الرستورونات معبية.. البيتزاريات معبية..البارات معبية.. الوتلا معبية.. المهرجانات معبية ..السهريات معبية.. الستادات معبية.. المغازات معبية..الفريب معبي.. العطارة معبية.. الباتيسريات معبية.. الجزارة معبية.. المرشيات معبية.. القفف معبية.. الخبز البايت معبي.. الزبل معبية.. المكاتب معبية.. تقول البلاد ما عندها حتى علاقة بالازمة الاقتصادية العالمية.. ولا بأوروبا الغربية.. ولا أمريكا الشمالية.. ولا بالكرة الأرضية.. ربي يدوم علينا هالنعمة ونقعدو خالطين على قدمة.. ونشمو ريحة اللحمة ..آمين يا رب العالمين... فيصل الصمعي للتعليق على هذا الموضوع: