انا قررت قرار لا رجعة فيه ولا جدال فيه ولا نقاش.. باش نمشي نبدل اللوك متاعي مرة وحدة.. حتى مرتي ما عادش باش تعقلني.. وهكاكة باش نحلى في عينها ونولي نسخة مطابقة للاصل من الفنانين المضروبة فيهم للكرومة في الفضائيات والتلفزات والمهرجانات اول حاجة باش نعملها نطول شعري ونخليه مسبسب على اكتافي ونعملو عكسة ونردو كل خصلة بلون اصفر على احمر على اخضر على وردي على قزوردي.. ثاني خطوة باش نمشي نركب بلالط في وذني.. ونلبس مريول فضيلة.. ونخلي زنودي عرايا ونوشم اكتافي يا papion يا scorpion يا sauf ma mere يا I love you .. وباش نزيد نركّب lentilles bleus ونزيد نضربلها سروال دجين حزامو طايح للمخارق ويبدا واسع كي الشكارة وساقيه تتكركر في القاعة.. وما بين الرقعة والرقعة تلقى رقعة ونحطلها طربوشة والا كاسكات مقلوبة على راسي وولكمان في وذني ونبدا نهار كامل وانا نمشي ونميل على انغام موسيقى الراب والهيب هوب والراي وال street وهلم جرا.. اما الحرم المصون والدر المكنون دبرتلها برنامج آخر.. اول فقرة في البرنامج هو اني باش نقرعلها على الزيرو.. ونحللها كولوارات كيف ستاد رادس كل كولوار بلون ونعبيلها ايديها بطرناطة خواتم.. شطرهم روس موتى.. ورقبتها بعشرة شرك وننقبلها خشمها وصرتها وشفايفها وكان عندها هي اقتراحات اخرى ما فيها باس ونزيد ندهنلها بدنها بالوشم.. يا اكتافها يا كرشها يا صدرها وكان عندها اقتراحات اخرى ما فيها باس ونلبسها مريول خلعة متاع بنتي الصغيرة باش يبدا كل شي على برة وجيب ما نخبيش عليك نوع نودك وما نشهيك وهكاكة نعملو couple فورميدابل ونوليو متماشين مع الحضارة والتقدم ومواكبين عصرنا واللي يشوفنا ما يفرقناش على مادونا والا بريتني سبيرز والا جورج مايكل والا مايكل جاكسون والا رشدي علوان وهشام سلام. وموش عجب نقررو باش نشاركو مع بعضنا في ستار اكاديمي رغم اللي صوتنا ما يفرقش برشة على صوت انكر الاصوات لكن على الاقل نوليو مشهورين ونعديو مديدة في لبنان شايخين ناكلو بالقدا ونشربو بالقدا ونرقدو بالقدا ووجوهنا كل يوم ممدودة في التلافز والناس تصوتلنا وتبعثنا في ال sms وحتى كان ما نجحناش يستقبلونا بالورود في المطار وندبرو كنتراتوات في البواطات والرستورونات واذا ما فماش نعملوا شوية اعلانات واشهارات على الياغورت والقوفرات نصورو بيهم شوية حنينات.. الحكاية وفات..
